మార్కెట్లోకి సరికొత్త కాంపోజిట్ గ్యాస్ సిలిండర్లు అందుబాటులోకి వచ్చాయి. సాంప్రదాయ స్టీల్ సిలిండర్లతో పోలిస్తే ఇవి ఎంతో తేలికైనవి, సురక్షితమైనవి మరియు ఆధునిక డిజైన్‌ను కలిగి ఉన్నాయి. ప్రభుత్వ రంగ చమురు సంస్థలైన ఇండియన్ ఆయిల్ ,భారత్ పెట్రోలియం మరియు హెచ్‌పీసీఎల్ ఈ 10 కేజీల కాంపోజిట్ సిలిండర్లను దేశవ్యాప్తంగా విస్తరిస్తున్నాయి.

కాంపోజిట్ సిలిండర్ల ప్రత్యేకతలు

తేలికపాటి బరువు: ఇవి సాధారణ స్టీల్ సిలిండర్ల కంటే 50 శాతం తక్కువ బరువు ఉంటాయి. దీనివల్ల వీటిని మోయడం, ఒక చోటు నుంచి మరో చోటుకి తీసుకెళ్లడం చాలా సులభం.

గ్యాస్ లెవెల్ కనిపిస్తుంది: ఈ సిలిండర్ల బాడీ ట్రాన్స్‌లూసెంట్ ఉంటుంది. అందువల్ల సిలిండర్‌లో ఇంకా ఎంత గ్యాస్ మిగిలి ఉందో బయటి నుంచే స్పష్టంగా చూసి తెలుసుకోవచ్చు.

తుప్పు పట్టవు : ఇవి ఫైబర్ గ్లాస్ కాంపోజిట్ మెటీరియల్‌తో తయారవడం వల్ల తుప్పు పట్టవు. వంటగది ఫ్లోరింగ్‌పై ఎలాంటి మరకలు పడవు.

ఎక్కువ భద్రత: ఇవి అత్యంత సురక్షితమైనవి. ప్రమాదవశాత్తూ మంటలు అంటుకున్నా ఇవి సాంప్రదాయ సిలిండర్లలా పేలిపోవు.

లభ్యత మరియు ధరల వివరాలు

పరిమాణం: ప్రస్తుతం మార్కెట్లో 10 కేజీల మరియు 5 కేజీల పరిమాణాలలో ఇవి లభిస్తున్నాయి.

ధర ,డిపాజిట్: నిపుణుల మరియు ఏజెన్సీల తాజా సమాచారం ప్రకారం, కొత్త కాంపోజిట్ కనెక్షన్ సెక్యూరిటీ డిపాజిట్ సుమారు ₹2,200 నుండి ₹3,000 వరకు (కంపెనీ/పరిమాణాన్ని బట్టి) ఉంటుంది. ఉదాహరణకు, భారత్ గ్యాస్ లైట్ పూర్తి సిలిండర్ ప్రారంభ ధర సుమారు ₹4,910 గా ఉంది, అందులో గ్యాస్ రీఫిల్ ఖర్చు సుమారుగా ₹1,400 ఉంటుంది.

ఫ్రీ ట్రేడ్ ఎల్‌పీజీ : వీటిని 'ఫ్రీ ట్రేడ్ ఎల్‌పీజీ' కింద కూడా అందిస్తున్నారు. అంటే కేవలం ఒక గుర్తింపు కార్డు ఇస్తే చాలు, ఎలాంటి అడ్రస్ ప్రూఫ్ లేకుండానే తక్షణమే కనెక్షన్ పొందవచ్చు.

ఎక్స్‌ప్రెస్ డెలివరీ: కొన్ని ప్రాంతాల్లో వీటిని బుక్ చేసిన 4 గంటల వ్యవధిలోనే ఇంటికి డెలివరీ చేసే ప్రత్యేక సౌకర్యాన్ని కూడా కల్పిస్తున్నారు.

ఈ కొత్త సిలిండర్లు ముఖ్యంగా వలస కార్మికులకు, అద్దె ఇళ్లలో ఉండే విద్యార్థులకు, చిన్న వ్యాపారులకు మరియు ఆధునిక వంటగది సౌకర్యాలను కోరుకునే వారికి ఎంతో ఉపయోగకరంగా మారాయి.