వరల్డ్ ఎకనామిక్ ఫోరమ్ (WEF) ప్రకటించిన 2026 టెక్నాలజీ పయనీర్స్ ప్రతిష్టాత్మక జాబితాలో భారతదేశానికి చెందిన 9 స్టార్టప్‌లు స్థానం సంపాదించుకున్నాయి.ప్రపంచవ్యాప్తంగా వినూత్న ఆవిష్కరణలు, డీప్-టెక్, ఆర్టిఫిషియల్ ఇంటెలిజెన్స్ (AI), మరియు స్పేస్ టెక్నాలజీ రంగాలలో రాణిస్తున్న 100 స్టార్టప్‌లతో కూడిన ఈ జాబితాను WEF అధికారిక నివేదిక విడుదల చేసింది.

టెక్ పయనీర్స్ జాబితాలో నిలిచిన ఆ 9 భారతీయ అంకురాల వివరాలు ఇక్కడ ఉన్నాయి:

స్పేస్ & ఏరోస్పేస్ టెక్నాలజీ

ధ్రువ స్పేస్: ఉపగ్రహాల  తయారీ, అంతరిక్ష పరిశోధనల కోసం చిన్న శాటిలైట్ ప్లాట్‌ఫారమ్‌లను అభివృద్ధి చేస్తోంది.

బెల్లాట్రిక్స్ ఏరోస్పేస్: అంతరిక్షంలో శాటిలైట్లు ప్రయాణించడానికి అవసరమైన అత్యాధునిక ప్రొపల్షన్ సిస్టమ్స్  తయారు చేస్తోంది.

ఆర్బిట్ ఎయిడ్: అంతరిక్ష కక్ష్యలో ఉన్న ఉపగ్రహాలకు ఇంధనం నింపడం, రిపేర్ చేయడం వంటి సేవలను అందిస్తోంది.

ఇథిరియల్ ఎక్స్‌ప్లోరేషన్ గిల్డ్: తక్కువ ఖర్చుతో అంతరిక్ష ప్రయోగాలు చేసేందుకు పునర్వినియోగ రాకెట్లను రూపొందిస్తోంది.

ఏవియేషన్ & డ్రోన్ టెక్నాలజీ

ఎయిర్‌బౌండ్: గ్రామీణ ప్రాంతాల ఆరోగ్య వ్యవస్థల కోసం డ్రోన్ల ద్వారా రక్తం, అత్యవసర వైద్య సామాగ్రిని సరఫరా చేసే నెట్‌వర్క్‌ను నిర్వహిస్తోంది.

సరళా ఏవియేషన్: నగరాల్లో ట్రాఫిక్ సమస్యలను తగ్గించేందుకు ఎలక్ట్రిక్ ఎయిర్ టాక్సీలను (eVTOL) నిర్మిస్తోంది.

క్లైమేట్ & బయోటెక్నాలజీ

వరాహ : వ్యవసాయ రంగంలో పర్యావరణ పరిరక్షణ కోసం రిమోట్ సెన్సింగ్, బ్లాక్‌చైన్ సాంకేతికతలను ఉపయోగిస్తోంది.

ఫెర్మ్‌బాక్స్ బయో: ఫెర్మెంటేషన్ ప్రక్రియ ద్వారా ప్రత్యామ్నాయ లిపిడ్లు, ప్రొటీన్లు, పర్యావరణహిత రసాయనాలను ఉత్పత్తి చేస్తోంది.

హెల్త్‌కేర్ ఇన్‌ఫ్రాస్ట్రక్చర్

బోర్డర్‌ప్లస్: వైద్య నిపుణులు అంతర్జాతీయంగా ఉన్న అత్యుత్తమ ఉపాధి అవకాశాలను సులభంగా పొందేందుకు వీలు కల్పించే డిజిటల్ ప్లాట్‌ఫారమ్.

ఈ స్టార్టప్‌లు రాబోయే రెండేళ్ల పాటు వరల్డ్ ఎకనామిక్ ఫోరమ్‌తో కలిసి అంతర్జాతీయ స్థాయి నాయకులతో, విధాన నిర్ణేతలతో కలిసి పనిచేసే అవకాశం పొందుతాయి.