ఐరోపాకు చెందిన ప్రముఖ శాటిలైట్ ఆపరేటర్ 'శాటిలియాట్' భారతీయ ఇంటర్నెట్ ఆఫ్ థింగ్స్ (IoT) మార్కెట్లోకి అధికారికంగా అడుగుపెట్టింది.భారత్‌లో తన వ్యాపార విస్తరణ కోసం ప్రత్యేకంగా ఒక సంస్థను ఏర్పాటు చేసింది.

ప్రత్యేక సేవలు

స్టార్‌లింక్, అమెజాన్ కూపర్ లేదా జియో శాటిలైట్ వంటి సంస్థలు పెద్ద మొత్తంలో డేటా అవసరమయ్యే బ్రాడ్‌బ్యాండ్ ఇంటర్నెట్‌పై దృష్టి పెడుతుండగా, శాటిలియాట్ మాత్రం కేవలం ఐఓటీ పరికరాల కనెక్టివిటీపైనే దృష్టి సారిస్తుంది.ఇది వీడియోలు లేదా భారీ ఫైళ్లను కాకుండా, కేవలం కొన్ని బైట్ల సైజు గల చిన్న డేటా సందేశాలను మాత్రమే బదిలీ చేస్తుంది.

లబ్ధి పొందే రంగాలు

మొబైల్ టవర్ల నెట్‌వర్క్ లేని మారుమూల ప్రాంతాలు, అడవులు, కొండలు లేదా సముద్ర తీరాలలో కూడా ఎటువంటి అంతరాయం లేకుండా నేరుగా పరికరాల నుండి ఉపగ్రహానికి సమాచారాన్ని చేరవేయడానికి ఇది ఉపయోగపడుతుంది. దీనివల్ల కింది రంగాలు లాభపడతాయి:

వ్యవసాయం: పొలాల్లో మట్టి తేమను కొలిచే సెన్సార్ల నిర్వహణకు.

రవాణా & లాజిస్టిక్స్: మారుమూల ప్రాంతాల్లో ప్రయాణించే వాహనాల ట్రాకర్లను నిరంతరం పర్యవేక్షించడానికి.

స్మార్ట్ మీటర్లు: విద్యుత్, గ్యాస్ మరియు నీటి వినియోగానికి సంబంధించిన స్మార్ట్ మీటర్ల రీడింగ్స్ కోసం.

గనులు & యుటిలిటీస్: మైనింగ్ పరిశ్రమలలో మౌలిక వసతుల పర్యవేక్షణకు.

తక్కువ ఖర్చుతో కూడిన సాంకేతికత

3GPP గ్లోబల్ స్టాండర్డ్స్ ఆధారంగా ఈ సేవలు పనిచేస్తాయి.

దీనివల్ల సాధారణ ఐఓటీ పరికరాలకు ఎటువంటి అదనపు భారీ యాంటెనాలు లేదా ప్రత్యేకమైన హార్డ్‌వేర్ మార్పులు అవసరం లేకుండానే, ఒకే సిమ్ కార్డ్ ద్వారా నేరుగా శాటిలైట్ నెట్‌వర్క్‌కు అనుసంధానం కావచ్చు. దీనివల్ల మెయింటెనెన్స్ మరియు కనెక్టివిటీ ఖర్చులు చాలా వరకు తగ్గుతాయి.

ప్రభుత్వానికి ప్రతిపాదన

బ్రాడ్‌బ్యాండ్ ఇంటర్నెట్ స్పెక్ట్రమ్ నిబంధనలు,రేట్లు ,విధానాలను ఐఓటీ రంగానికి వర్తింపజేయవద్దని, ఈ రంగానికి ప్రత్యేకమైన రాయితీలతో కూడిన నియంత్రణ ఫ్రేమ్‌వర్క్ అందించాలని శాటిలియాట్ సంస్థ భారత ప్రభుత్వాన్ని, ట్రాయ్ను కోరింది.