వెనెజువెలా నుంచి భారత్‌కు భారీగా ముడి చమురు (Crude Oil) సరఫరా జరుగుతోంది. పశ్చిమాసియా (Middle East) సంక్షోభం, ఇరాన్ యుద్ధ ప్రభావం వల్ల అంతర్జాతీయ చమురు సరఫరాకు ఆటంకాలు ఏర్పడిన వేళ, భారత రిఫైనరీలు వెనెజువెలా నుంచి చౌకగా లభించే భారీ క్రూడ్ కొనుగోళ్లను గణనీయంగా పెంచాయి. ఎనర్జీ కార్గో ట్రాకర్ 'కెప్లర్' (Kpler) తాజా గణాంకాల ప్రకారం, మే 2026 లో వెనెజువెలా.. సౌదీ అరేబియా, అమెరికా దేశాలను వెనక్కి నెట్టి భారత్‌కు మూడో అతిపెద్ద చమురు సరఫరాదారుగా అవతరించింది.

వెనెజువెలా ఈ మే నెలలో ఇప్పటివరకు భారత్‌కు రోజుకు సుమారు 4,17,000 బ్యారెళ్ల (bpd) ముడి చమురును సరఫరా చేసింది. ఇది ఏప్రిల్‌లోని 2,83,000 bpd తో పోలిస్తే చాలా ఎక్కువ.ప్రస్తుతం భారత్‌కు అత్యధికంగా చమురు అందిస్తున్న దేశాలలో రష్యా, యూఏఈ (UAE) మొదటి రెండు స్థానాల్లో ఉండగా, వెనెజువెలా మూడో స్థానాన్ని ఆక్రమించింది.గత కొన్ని నెలలుగా దాదాపు 1.2 కోట్ల (12 million) బ్యారెళ్చమురు భారత పశ్చిమ తీరానికి చేరుకుంది. 2020 ఫిబ్రవరి తర్వాత ఆ దేశం నుంచి భారత్‌కు జరిగిన అతిపెద్ద సరఫరా ఇదే.

భారీగా చమురు కొనడానికి ప్రధాన కారణాలు

అమెరికా ఆంక్షల సడలింపు: ఈ ఏడాది జనవరిలో వెనెజువెలా రాజకీయ పరిణామాల తర్వాత అమెరికా ఆంక్షలను సడలించడంతో పాటు, అమెరికా నియంత్రణలో ఉండే ఒక ప్రత్యేక వ్యవస్థ ద్వారా భారత్‌కు చమురు విక్రయించేందుకు గ్రీన్ సిగ్నల్ ఇచ్చింది.

భారీ డిస్కౌంట్లు: వెనెజువెలా ముడి చమురు అంతర్జాతీయ మార్కెట్ ధరల కంటే చాలా తక్కువ ధరకు, ఆకర్షణీయమైన డిస్కౌంట్లతో లభిస్తోంది. దీనివల్ల భారత్‌కు ఏటా 3 బిలియన్ డాలర్ల వరకు ఆదా అయ్యే అవకాశం ఉందని ఎస్‌బీఐ (SBI) నివేదిక పేర్కొంది.

భారతీయ రిఫైనరీల సామర్థ్యం: వెనెజువెలా నుంచి వచ్చేది సాధారణంగా 'హెవీ క్రూడ్' (భారీ ముడి చమురు) రకానికి చెందినది. రిలయన్స్ ఇండస్ట్రీస్ (Reliance Industries), భారత్ పెట్రోలియం (BPCL), హెచ్‌ఎంఈఎల్ (HMEL) వంటి అధునాతన భారతీయ రిఫైనరీలు ఈ రకమైన చమురును సులభంగా ప్రాసెస్ చేయగలవు. ఇందులో రిలయన్స్ సంస్థే అత్యధికంగా కొనుగోలు చేస్తోంది.

రవాణా వ్యయం తగ్గింపు: చమురును వేగంగా, తక్కువ ఖర్చుతో తరలించడానికి 2 మిలియన్ బ్యారెళ్ల సామర్థ్యం గల 'సూపర్ ట్యాంకర్లను' (VLCC - Very Large Crude Carriers) రంగంలోకి దించారు.

ఈ వ్యూహాత్మక మార్పు వల్ల అంతర్జాతీయ మార్కెట్లో చమురు ధరలు పెరిగినప్పటికీ, దేశీయంగా పెట్రోల్, డీజిల్ ధరలు స్థిరంగా ఉండేందుకు మరియు భారత్‌కు ఇంధన భద్రత లభించడానికి ఎంతో సహాయపడుతోంది.