కేంద్ర ప్రభుత్వం కోవిడ్-19 నాటి కాంటాక్ట్ ట్రేసింగ్ యాప్‌ను పూర్తి స్థాయి జాతీయ డిజిటల్ హెల్త్ ప్లాట్‌ఫామ్‌గా మారుస్తూ 'ఆరోగ్య సేతు 2.0' (Aarogya Setu 2.0) యాప్‌ను అధికారికంగా ఆవిష్కరించింది. న్యూఢిల్లీలోని విజ్ఞాన్ భవన్‌లో జరిగిన కార్యక్రమంలో కేంద్ర ఆరోగ్య శాఖ మంత్రి జేపీ నడ్డా ఈ సరికొత్త డిజిటల్ హెల్త్ ప్లాట్‌ఫామ్‌ను ప్రారంభించారు.

ఆయుష్మాన్ భారత్ డిజిటల్ మిషన్ (ABDM) కింద రూపొందించిన ఈ యాప్, ఇకపై కేవలం కోవిడ్‌కే పరిమితం కాకుండా ప్రతి భారతీయుడికి వ్యక్తిగత డిజిటల్ ఆరోగ్య సేవలను ఒకే వేదికపై అందించే సింగిల్ గేట్‌వేగా పనిచేస్తుంది.

ఆరోగ్య సేతు 2.0 ముఖ్యమైన ఫీచర్లు

ABHA ఖాతా నిర్వహణ: వినియోగదారులు ఆధార్ ఫేస్ అథెంటికేషన్ ద్వారా నిమిషాల్లో తమ ఆయుష్మాన్ భారత్ హెల్త్ అకౌంట్ (ABHA) ఐడీని క్రియేట్ చేసుకోవచ్చు.

AI ఆధారిత హెల్త్ రికార్డులు: గూగుల్ ‘Gemma 4’ ఓపెన్ మోడల్స్, మెడికల్ డేటా టూల్‌కిట్ సహాయంతో ప్రిస్క్రిప్షన్లు, ల్యాబ్ రిపోర్టులు (PDFలు) సులభంగా డిజిటల్ రికార్డులుగా మారిపోతాయి.

OPD టోకెన్ బుకింగ్: హాస్పిటల్స్ లేదా క్లినిక్‌లలో క్యూలో నిలబడకుండా "స్కాన్ అండ్ షేర్" (Scan & Share) ద్వారా క్షణాల్లో OPD రిజిస్ట్రేషన్ చేసుకోవచ్చు.

PM-JAY వాలెట్ & ఇన్సూరెన్స్: ఆయుష్మాన్ భారత్ (PM-JAY) లబ్ధిదారులు తమ ఇన్సూరెన్స్ కవరేజీ, వాలెట్ బ్యాలెన్స్ మరియు క్లెయిమ్ వివరాలను ఇందులో చూసుకోవచ్చు.

వైద్య సేవల గుర్తింపు: మీ లొకేషన్ ఆధారంగా సమీపంలోని హాస్పిటల్స్, బ్లడ్ బ్యాంకులు (e-RaktKosh), జన ఔషధి కేంద్రాలు మరియు అంబులెన్స్ సేవలను సులభంగా కనుగొనవచ్చు.

స్మార్ట్ వేరబుల్స్ అనుసంధానం: స్మార్ట్ వాచ్‌లను లింక్ చేయడం ద్వారా గుండె వేగం (Heart rate), గ్లూకోజ్ స్థాయిలు, మరియు రోజువారీ ఫిట్‌నెస్‌ను ట్రాక్ చేయవచ్చు.

కుటుంబ ప్రొఫైల్స్: ఒకే అకౌంట్‌లో కుటుంబ సభ్యుల వివరాలను జోడించి అందరి ఆరోగ్య రికార్డులను ఒకే చోట భద్రపరుచుకోవచ్చు.

డేటా భద్రత : వినియోగదారుడి అనుమతి (Consent) ఉంటేనే ఆరోగ్య రికార్డులు డాక్టర్లు లేదా హాస్పిటల్స్‌తో షేర్ అవుతాయి. ఎప్పుడైనా ఈ అనుమతిని రద్దు చేసుకోవచ్చు.

ఈ సరికొత్త అప్‌డేట్‌తో పాటు ఇన్సూరెన్స్ క్లెయిమ్‌లను వేగవంతం చేసేందుకు 'నేషనల్ హెల్త్ క్లెయిమ్స్ ఎక్స్ఛేంజ్' (NHCX) ప్లాట్‌ఫామ్‌ను, మరియు లబ్ధిదారుల సహాయం కోసం 'ఆయుష్మాన్ సారథి' వాట్సాప్ చాట్‌బాట్‌ను కూడా కేంద్ర ప్రభుత్వం అందుబాటులోకి తెచ్చింది. దీనివల్ల దేశంలో కాగిత రహిత (Paperless) వైద్య సేవలు మరింత వేగంగా అందనున్నాయి.