సుప్రీం కోర్టు బీసీ రిజర్వేషన్ల పెంపుపై దాఖలైన స్పెషల్ లీవ్ పిటిషన్‌ను కొట్టివేయడంతో, తెలంగాణ ప్రభుత్వం పునరాలోచనలో పడింది. ఈ తీర్పుతో స్థానిక సంస్థల ఎన్నికల నిర్వహణ విషయంలో కొత్త పరిస్థితులు ఏర్పడ్డాయి. ప్రస్తుతం ఎన్నికలు నిర్వహించడం అనివార్యమని ప్రభుత్వం భావిస్తోంది. అందుకే పార్టీపరంగా బీసీలకు 42 శాతం రిజర్వేషన్‌ కేటాయించి ఎన్నికలకు వెళ్లాలనే దిశగా సూత్రప్రాయంగా నిర్ణయం తీసుకుంది. ఈ అంశంపై రాబోయే రెండు రోజుల్లో న్యాయ నిపుణులతో సమావేశం నిర్వహించి వారి సలహాలు తీసుకోనుంది.

ఈనెల 19న గాంధీభవన్‌లో జరగనున్న టీపీసీసీ (తెలంగాణ ప్రదేశ్ కాంగ్రెస్ కమిటీ) రాజకీయ వ్యవహారాల కమిటీ సమావేశంలో ఈ అంశంపై విస్తృత చర్చ జరగనుంది. ఈ సమావేశం తర్వాత పార్టీ తుది నిర్ణయం ప్రకటించే అవకాశం ఉంది. గురువారం సచివాలయంలో జరిగిన మంత్రివర్గ సమావేశంలో కూడా ఈ అంశం ప్రధాన చర్చకు వచ్చింది. హైకోర్టు మరియు సుప్రీం కోర్టు రెండూ పాత రిజర్వేషన్‌ విధానంతోనే స్థానిక ఎన్నికలు నిర్వహించాలని సూచించిన నేపథ్యంలో అదే ప్రకారంగా ముందుకు వెళ్లాలా లేదా అనే విషయంలో మంత్రివర్గంలో చర్చ జరిగింది.

ఎన్నికలు ఆలస్యం కావడంతో కేంద్ర నిధులు ఆగిపోతున్నాయని, స్థానిక పాలనలో జాప్యం జరుగుతోందని పలువురు మంత్రులు ఆందోళన వ్యక్తం చేశారు. న్యాయపరమైన పోరాటం కొనసాగితే మరింత సమయం పట్టే అవకాశం ఉందని కూడా వారు భావించారు. ఈ నేపథ్యంలో, పార్టీపరంగా బీసీలకు 42 శాతం రిజర్వేషన్‌ కేటాయించి ఎన్నికలు నిర్వహించాలనే అభిప్రాయం మంత్రివర్గంలో మెజారిటీగా వినిపించింది. అయితే కొందరు మాత్రం చట్టపరమైన స్పష్టత వచ్చిన తర్వాతనే ఎన్నికలు నిర్వహించాలన్న అభిప్రాయాన్ని వెల్లడించారు.

ఈ అంశంపై కేసును వాదించిన సీనియర్ న్యాయవాదులు మరియు ఇతర న్యాయ నిపుణులతో సంప్రదింపులు జరిపి వారి సూచనల మేరకు ప్రభుత్వం ముందుకు వెళ్లాలని నిర్ణయించింది. ఆదివారం టీపీసీసీ పీఏసీ సమావేశంలో తుది నిర్ణయం తీసుకునే అవకాశం ఉంది.

క్యాబినెట్ సమావేశం అనంతరం మంత్రి పొంగులేటి శ్రీనివాస్ రెడ్డి మాట్లాడుతూ, “బీసీ రిజర్వేషన్ల పెంపు జీవోపై హైకోర్టు స్టే ఇచ్చిన తర్వాత, ప్రభుత్వం సుప్రీం కోర్టులో స్పెషల్ లీవ్ పిటిషన్ వేసింది. అయితే అది కొట్టివేయబడింది. కానీ పూర్తి వివరాలు ఇంకా అందలేదు. కోర్టు వ్యాఖ్యలు వచ్చిన తర్వాత న్యాయపరంగా, సామాజికంగా చర్చించి నిర్ణయం తీసుకుంటాం” అని తెలిపారు.

ప్రభుత్వం ఈనెల 23న మరోసారి క్యాబినెట్‌ సమావేశం నిర్వహించి తుది నిర్ణయం తీసుకోనుంది. అందులో బీసీ రిజర్వేషన్లపై అధికారిక నిర్ణయం ప్రకటించే అవకాశం ఉంది. పార్టీ వర్గాల అంచనా ప్రకారం, బీసీలకు 42 శాతం రిజర్వేషన్లతో స్థానిక సంస్థల ఎన్నికలు త్వరలోనే జరగనున్నాయి.