Breaking News

సౌదీ అరేబియాలో భయానక బస్సు ప్రమాదం – 42 మంది భారతీయ యాత్రికులు మృతి

సౌదీ అరేబియాలో భయానక బస్సు ప్రమాదం – 42 మంది భారతీయ యాత్రికులు మృతి


Published on: 17 Nov 2025 10:16  IST

సౌదీ అరేబియాలోని మక్కా–మదీనా రహదారిపై భారీ రోడ్డు ప్రమాదం చోటుచేసుకుని 42 మంది భారతీయ యాత్రికులు ప్రాణాలు కోల్పోయిన దుర్ఘటన వెలుగులోకి వచ్చింది. యాత్రికులను తీసుకెళ్తున్న బస్సును డీజిల్‌తో నిండిన ట్యాంకర్ ఢీకొనడంతో ఒక్కసారిగా మంటలు వ్యాపించి బస్సు పూర్తిగా దహనమైంది. మృతుల్లో చాలా మంది హైదరాబాద్‌కు చెందిన వారని మొదటి సమాచారం తెలియజేస్తోంది.

సోమవారం తెల్లవారుజామున సుమారు 1.30 గంటల సమయంలో ఈ ప్రమాదం జరిగినట్లు అక్కడి మీడియా వివరించింది. మక్కా యాత్ర పూర్తి చేసుకుని మదీనా దిశగా ప్రయాణిస్తుండగా, బస్సు ట్యాంకర్‌ను ఢీకొనగానే భారీగా మంటలు చెలరేగాయి. ప్రమాద సమయంలో చాలామంది యాత్రికులు నిద్రలో ఉండటం వల్ల బయటపడడానికి అవకాశం లేకపోయిందని వర్గాలు చెబుతున్నాయి.

మరణించిన వారిలో మహిళలు, పిల్లల సంఖ్య ఎక్కువగా ఉన్నట్లు సమాచారం. మల్లేపల్లి, బజార్‌ఘాట్ ప్రాంతాలకు చెందిన కనీసం 16 మంది ఈ ప్రమాదంలో ప్రాణాలు కోల్పోయి ఉండొచ్చని అనుమానాలు వ్యక్తం అవుతున్నాయి. బస్సు పూర్తిగా కాలిపోయిన కారణంగా మృతదేహాలను గుర్తించడం కష్టంగా మారింది. సహాయక బృందాలు అక్కడే శోధన, రక్షణ చర్యలను కొనసాగిస్తున్నాయి.

ఈ దుర్ఘటన నుంచి ఒక వ్యక్తి మాత్రమే ప్రాణాలతో బయటపడినట్లు ప్రతికూల పరిస్థితుల్లో తెలిసింది. అతడు ఇచ్చిన వివరాల ఆధారంగా అధికారులు మరింత సమాచారం సేకరిస్తున్నారు.

ఇదిలా ఉండగా, కేంద్ర ప్రభుత్వం ఇంకా అధికారిక ప్రకటన ఇవ్వలేదు. హజ్ కమిటీ అధికారులు ప్రమాదంపై స్పష్టమైన నివేదిక ఈరోజు మధ్యాహ్నం వచ్చే అవకాశముందని తెలిపారు. మృతుల్లో హైదరాబాద్, తెలంగాణ వాసులు ఉంటే వారు ఏ ఏజెన్సీ ద్వారా యాత్రకు వెళ్లారన్న దానిపై కూడా విచారణ సాగుతోంది.

Follow us on , &

ఇవీ చదవండి

ట్రెండింగ్ వార్తలు మరిన్ని

Advertisement