అమెరికా అధ్యక్షుడు డొనాల్డ్ ట్రంప్ తాజాగా తీసుకున్న నిర్ణయం భారత ఐటీ రంగంలో తీవ్ర చర్చకు దారి తీసింది. కొత్తగా జారీ చేసే హెచ్-1బీ వీసాలపై లక్ష డాలర్ల ఫీజు విధిస్తూ ఆదేశాలు జారీ చేశారు. సెప్టెంబర్ 21 నుంచి ఈ నిబంధన అమల్లోకి వచ్చింది. ఒక సంవత్సరం పాటు ఇది ఎగ్జిక్యూటివ్ ఆర్డర్ రూపంలో అమలవుతుంది. ఈలోపు అమెరికా కాంగ్రెస్‌లో చట్టం చేస్తే, ఇది శాశ్వతంగా అమల్లోకి వస్తుంది.

భారతదేశం నుంచి అమెరికాకు వెళ్తున్న ఉద్యోగుల వార్షిక వేతనం సాధారణంగా 60 వేల నుంచి 1.4 లక్షల డాలర్ల మధ్యలో ఉంటుంది. ఈ నేపథ్యంలో ఒక్కో వీసాపై లక్ష డాలర్ల ఫీజు చెల్లించడం కంపెనీలకు పెద్ద భారమని పరిశ్రమ వర్గాలు చెబుతున్నాయి. అయితే అందరికీ ఈ ఫీజు వర్తిస్తుందా లేదా కొన్ని మినహాయింపులు ఉంటాయా అన్నది కీలక ప్రశ్నగా మారింది.

మినహాయింపుల అవకాశాలు

ట్రంప్ జారీ చేసిన ఆదేశాలలోని ఒక సెక్షన్ ప్రకారం, అమెరికా ప్రాధాన్యతలకు అనుగుణంగా కొన్ని రంగాలకు మినహాయింపు ఇచ్చే అధికారం హోంల్యాండ్ సెక్యూరిటీ విభాగానికి ఉంది. అమెరికాలో అవసరమైన ప్రత్యేక నైపుణ్యం ఉన్నవారిని ఆకర్షించడమే దీని ఉద్దేశం. ఇప్పటికే వైద్యులు, మెడికల్ రెసిడెంట్లకు మినహాయింపు ఇచ్చినట్లు సమాచారం.

మినహాయింపులు పొందే అవకాశం ఉన్న ప్రధాన రంగాలు:

• వైద్య సేవలు, ఆరోగ్య పరిశోధనలు

• రక్షణ, జాతీయ భద్రత

• స్టెమ్‌ రంగాలు (సైన్స్, టెక్నాలజీ, ఇంజినీరింగ్, మ్యాథ్స్‌)

• ఇంధన రంగం

• విమానయాన రంగం

• సైబర్‌ సెక్యూరిటీ

ఈ రంగాల్లో పనిచేసే నిపుణులకు ప్రత్యామ్నాయం వెంటనే దొరకడం కష్టం. అందువల్ల, అమెరికా ప్రభుత్వానికి కూడా ఈ నైపుణ్యాన్ని నిలుపుకోవడం అవసరమే. కాబట్టి ఈ రంగాలకు చెందిన ఉద్యోగులపై వీసా ఫీజు భారాన్ని మినహాయించే అవకాశం ఉందని భావిస్తున్నారు.

భారత ఐటీ రంగం ఆందోళనలో

అయితే, ఐటీ రంగానికి ఇలాంటి మినహాయింపు వర్తిస్తుందా లేదా అన్నది ఇంకా స్పష్టత రాలేదు. ఐటీ కంపెనీలు అమెరికా ప్రాజెక్టుల కోసం ఎక్కువగా హెచ్-1బీ వీసాలను వాడుతాయి. ఫీజు భారంతో కొత్త వీసాలకు దరఖాస్తు తగ్గే అవకాశం ఉందని, దీని ప్రభావం ఉద్యోగావకాశాలపై పడవచ్చని నిపుణులు హెచ్చరిస్తున్నారు.