Breaking News

బీఆర్‌ఎస్‌ నేతల ఫోన్లు, సీసీ కెమెరాలపై హ్యాకింగ్‌: టి. హరీశ్‌రావు ఆరోపణలు

బీఆర్‌ఎస్‌ నేతలపై కాంగ్రెస్ ప్రభుత్వం నిఘా పెట్టిందని, ఫోన్లు, సీసీ కెమెరాలను హ్యాక్ చేయిస్తున్నదని హరీశ్‌రావు ఆరోపించారు.


Published on: 29 Apr 2026 10:54  IST

బీఆర్‌ఎస్‌ ముఖ్యనేతల ఫోన్లు, ఇండ్ల ముందున్న సీసీ కెమెరాలను కాంగ్రెస్ ప్రభుత్వం ప్రైవేట్ హ్యాకర్ల ద్వారా హ్యాక్ చేయిస్తున్నదని టి. హరీశ్‌రావు తీవ్ర ఆరోపణలు చేశారు. బెంగళూరు నుంచి హ్యాకర్లను ఎంగేజ్ చేసి, హైదరాబాద్ పోలీస్ కమాండ్ కంట్రోల్ సెంటర్ నుంచే ఈ నిఘా కార్యకలాపాలు జరుగుతున్నాయని ఆయన పేర్కొన్నారు. ఈ వ్యవహారంలో కొందరు ఐపీఎస్ అధికారులు కూడా పాలుపంచుకుంటున్నారని, వారు చట్టం నుంచి తప్పించుకోలేరని హెచ్చరించారు.

ఇక ప్రశ్నించే వారిపై అక్రమ కేసులు నమోదు చేస్తూ ప్రభుత్వం రాచరిక ధోరణిని ప్రదర్శిస్తున్నదని హరీశ్‌రావు మండిపడ్డారు. బీఆర్‌ఎస్‌ సోషల్ మీడియా కన్వీనర్ క్రిశాంక్‌పై తప్పుడు కేసులు పెట్టి జైలులో పెట్టారని, అసలు నేరస్తులపై చర్యలు తీసుకోకుండా నిర్దోషులను లక్ష్యంగా చేసుకుంటున్నారని విమర్శించారు. ఫేక్ పోస్టులు చేసిన వారిపై కేసులు పెట్టాల్సిన పోలీసులు, ఫిర్యాదు చేసిన వారిపైనే కేసులు నమోదు చేయడం అన్యాయమని అన్నారు.

అక్రమ కేసులతో బీఆర్‌ఎస్‌ నాయకులను, కార్యకర్తలను భయపెట్టలేరని, ప్రశ్నించే గొంతులను అణచివేయడం అసాధ్యమని ఆయన స్పష్టం చేశారు. క్రిశాంక్‌పై పెట్టిన కేసుల్లో తీవ్రమైన సెక్షన్లు కూడా చేర్చారని, కోర్టు వాటిని కొట్టివేసిందని తెలిపారు. ఇది ప్రభుత్వ దుర్వినియోగానికి స్పష్టమైన ఉదాహరణ అని పేర్కొన్నారు.

ప్రభుత్వ అక్రమాలు, అవినీతిని ప్రశ్నించినందుకే కేసులు పెడుతున్నారని హరీశ్‌రావు ఆరోపించారు. తమ వద్ద ఉన్న సాక్ష్యాలను సమయం వచ్చినప్పుడు ప్రజల ముందు ఉంచుతామని, బాధ్యులపై కఠిన చర్యలు తీసుకుంటామని హెచ్చరించారు. భవిష్యత్తులో బీఆర్‌ఎస్‌ అధికారంలోకి వస్తే, ఈ వ్యవహారంలో పాల్గొన్న అధికారులపై చట్టపరమైన చర్యలు తీసుకుంటామని ఆయన స్పష్టం చేశారు.

Follow us on , &

ఇవీ చదవండి

ట్రెండింగ్ వార్తలు మరిన్ని

Advertisement