అమెరికా విధిస్తున్న భారీ సుంకాలను (Tariffs) తప్పించుకోవడానికి భారత్ సహా 40 కి పైగా దేశాలు చైనాకు సహకరిస్తున్నాయని వైట్ హౌస్ విడుదల చేసిన ఒక నివేదికలో అమెరికా ఆరోపించింది. "ది గ్రేట్ ట్రాన్స్‌షిప్‌మెంట్ స్కామ్" పేరిట అమెరికా అధ్యక్షుడి ప్రధాన వాణిజ్య సలహాదారు పీటర్ నెవారో ఈ నివేదికను విడుదల చేశారు. అయితే, ఇది భారత్ అధికారికంగా చైనాకు సహాయం చేస్తోందని కాదు, చైనా తన ఉత్పత్తులను భారత్ మీదుగా అమెరికాకు మళ్లిస్తోందని అమెరికా ఆందోళన వ్యక్తం చేస్తోంది.

అమెరికా చైనా ఉత్పత్తులపై భారీగా పన్నులు (సుంకాలు) విధిస్తోంది. వీటి నుంచి తప్పించుకోవడానికి చైనా ఒక 'షాడో ట్రాన్స్‌షిప్‌మెంట్ నెట్‌వర్క్' ను నడుపుతోందని అమెరికా పేర్కొంది.చైనా తన వస్తువులను నేరుగా అమెరికాకు పంపకుండా, భారత్, మెక్సికో, కెనడా, ఐరోపా సమాఖ్య, జపాన్ వంటి ఇతర దేశాలకు పంపుతుంది.ఆయా దేశాలలో ఆ వస్తువులకు కొద్దిగా ప్యాకేజింగ్ మార్చడం, రీలేబ్లింగ్ (భారత్‌లో తయారైనట్లు మార్చడం), లేదా రూట్ మార్చడం ద్వారా అవి చైనా వస్తువులు కావనే భ్రమ కల్పిస్తూ అమెరికా మార్కెట్లోకి తరలిస్తున్నారు.

భారత్‌పై వచ్చిన ప్రత్యేక ప్రస్తావనలు

ఈ నివేదికలో భారత్‌ను "Tier-1 డివర్సిఫైడ్ స్కేల్ లీడర్" కేటగిరీలో చేర్చారు.భారత్‌కు ఉన్న పెద్ద పారిశ్రామిక రంగం కారణంగా చైనా వస్తువులు భారతీయ ఉత్పత్తులుగా మారిపోయే ప్రమాదం ఎక్కువగా ఉందని అమెరికా భావిస్తోంది.

నివేదిక ప్రకారం, భారత్‌లోని పూణే-గుజరాత్-చెన్నై ఇండస్ట్రియల్ బెల్ట్ చైనాకు చెందిన పంపులు, కంప్రెషర్లను స్వీకరించి, వాటిని భారతీయ ఉత్పత్తులుగా అమెరికాలోని సిన్సినాటి, డేటన్ వంటి నగరాలకు తరలిస్తున్నాయని ఆరోపించారు. "పూణే నుంచి వచ్చే చైనా పంపుల వల్ల అమెరికాలోని స్థానిక కంపెనీలు దెబ్బతింటున్నాయి" అని పీటర్ నెవారో పేర్కొన్నారు.

అమెరికా తీసుకోబోయే చర్యలు

ఈ అక్రమ రవాణా వల్ల అమెరికా ఏడాదికి $19 బిలియన్ల నుండి $26 బిలియన్ల పన్ను ఆదాయాన్ని కోల్పోతోందని వైట్ హౌస్ తెలిపింది. దీనిని అరికట్టడానికి అమెరికా కింది చర్యలను ప్రకటించింది:

వాచ్‌లిస్ట్ : భారత్ సహా నివేదికలో పేర్కొన్న దేశాలపై నిరంతరం నిఘా ఉంచేందుకు వాచ్‌లిస్ట్‌లో చేర్చారు.

ఏఐ ఆధారిత నిఘా : నౌకాశ్రయాలకు వచ్చే సరకుల రవాణా మార్గాలు, కంపెనీల హిస్టరీని స్క్రీన్ చేయడానికి ఆర్టిఫిషియల్ ఇంటెలిజెన్స్ (AI) తో పనిచేసే "డిటెక్టివ్ బోర్డర్" వ్యవస్థను వాడుతున్నారు.

కఠినమైన జరిమానాలు: ఏదైనా కంపెనీ ఇలా చైనా వస్తువులను మళ్లించినట్లు తేలితే, గత ఏడాది కాలంలో ఆ కంపెనీ చేసిన మొత్తం రవాణాపై వెనక్కి వెళ్లి మరీ పన్నులు వసూలు చేస్తామని హెచ్చరించారు.

ప్రస్తుత పరిస్థితి

భారత్, అమెరికాల మధ్య ఇప్పటికే వాణిజ్య ఒప్పందాల పై చర్చలు జరుగుతున్న తరుణంలో ఈ నివేదిక రావడం గమనార్హం. అయితే, భారత్ స్వయంగా చైనాకు సహాయం చేయడం లేదు, చైనా కంపెనీలు అంతర్జాతీయ వాణిజ్య మార్గాలను ఉపయోగించుకుని అమెరికా పన్నులను తప్పించుకునే ప్రయత్నం చేస్తున్నాయని, దీనివల్ల భారత్ వంటి దేశాల ఎగుమతులు కూడా అమెరికా వద్ద మరింత కఠినమైన తనిఖీలను ఎదుర్కోవాల్సి వస్తుందని నిపుణులు విశ్లేషిస్తున్నారు.