తెలంగాణ ప్రజలు మళ్లీ కేసీఆర్ ప్రభుత్వాన్ని కోరుకుంటున్నారని భారాస కార్యనిర్వాహక అధ్యక్షుడు కేటీ రామారావు తెలిపారు. ప్రస్తుతం పరిస్థితులను “చంద్రుడిపై మబ్బులు కమ్ముకున్నాయి, అవి తొలగి మళ్లీ ప్రకాశించడం ఖాయం” అని వ్యాఖ్యానించారు. గతంలో తెలియక చేసిన పొరపాట్ల వల్ల ఓటమి చవిచూశామని, ఈసారి అలాంటి పరిస్థితి రానివ్వమని కేటీఆర్ అన్నారు.

మంచిర్యాల జిల్లా క్యాతనపల్లిలో నిర్వహించిన కార్యక్రమంలో మాట్లాడుతూ, తాను పార్టీ కోసం ఏ పనైనా చేసే ఆల్రౌండర్‌నని చెప్పారు. అవసరమైతే 2027లో పాదయాత్ర కూడా చేస్తానని, అప్పటివరకు దానికి సిద్ధమవుతానని అన్నారు. మే, జూన్ నెలల్లో పార్టీ సభ్యత్వ నమోదు, కార్యకర్తలకు శిక్షణ కార్యక్రమాలు నిర్వహించనున్నట్లు తెలిపారు.

భారాస పేరును మళ్లీ తెరాసగా మారుస్తారా అన్న ప్రశ్నకు స్పందిస్తూ, దీనిపై పార్టీలో చర్చించి తుది నిర్ణయం అధినేత కేసీఆర్ తీసుకుంటారని చెప్పారు. కవిత ప్రస్తావనపై మాట్లాడుతూ, పిల్లలు తల్లిదండ్రులను బాధ పెట్టకూడదని వ్యాఖ్యానించారు. జీవన్ రెడ్డి పార్టీలో చేరడం తమకు కలిసివచ్చే అంశమని పేర్కొన్నారు.

కాంగ్రెస్, భాజపాలపై తీవ్ర ఆరోపణలు చేస్తూ, కేంద్రంలో భాజపా, రాష్ట్రంలో కాంగ్రెస్ ప్రభుత్వాల మధ్య చీకటి ఒప్పందం ఉందని కేటీఆర్ అన్నారు. కాంట్రాక్టుల కేటాయింపుల్లో పరస్పర ప్రయోజనాలు ఉన్నాయని ఆరోపించారు. ముఖ్యమంత్రి రేవంత్ రెడ్డి బంధువులకు సింగరేణిలో నిబంధనలకు విరుద్ధంగా పనులు ఇచ్చినా కేంద్రం ప్రశ్నించడం లేదని అన్నారు. అదే సమయంలో అమృత్ పథకంలో భారీ కాంట్రాక్టులు కేటాయిస్తున్నారని పేర్కొన్నారు. బదులుగా రాష్ట్రంలో భాజపా ఎంపీలకు కాంట్రాక్టులు ఇస్తున్నారని ఆరోపించారు.

ఒకరి అవినీతిని మరొకరు బయటపెట్టకుండా కాపాడుకుంటున్నారని, గతంలో చేసిన ఆరోపణలపై ఇప్పటికీ విచారణలు జరగకపోవడాన్ని ప్రశ్నించారు. తెలంగాణను కుంభకోణాల కేంద్రంగా మార్చారని విమర్శించారు.

వ్యవసాయం విషయంలో మాట్లాడుతూ, 2014కు ముందు 24 లక్షల టన్నుల ధాన్యం ఉత్పత్తి కాగా, కేసీఆర్ నాయకత్వంలో అది 1.50 కోట్ల టన్నులకు పెరిగిందని తెలిపారు. రాష్ట్రాన్ని పంజాబ్, హరియాణాల కంటే ముందంజలో నిలిపిన కాళేశ్వరం ప్రాజెక్టు కీలకమని పేర్కొన్నారు.

ముఖ్యమంత్రి రేవంత్ రెడ్డి ప్రభుత్వం కుటుంబ పాలనతో దోపిడీకి పాల్పడుతోందని ఆరోపించారు. మహిళలను కోటీశ్వరులు చేస్తామని చెప్పే వారికి కోటిలో ఎన్ని సున్నాలు ఉంటాయో తెలుసా అని ప్రశ్నించారు. విమర్శలు చేస్తే అనుచిత వ్యాఖ్యలు చేస్తున్నారని, ప్రజలు విసిగిపోయారని అన్నారు.

సింగరేణి గనుల విషయంపై మాట్లాడుతూ, కేసీఆర్ ప్రభుత్వం 16 వేల కారుణ్య నియామకాలు చేపట్టిందని గుర్తు చేశారు. దీనిపై విచారణలు చేస్తామన్న ఉప ముఖ్యమంత్రి వ్యాఖ్యలపై అభ్యంతరం లేదన్నారు. కాంగ్రెస్ ప్రభుత్వం ప్రకటించిన మెడికల్ బోర్డు ఎందుకు ఏర్పాటు చేయలేదో ప్రశ్నించాలని అన్నారు. సింగరేణి గనుల సమస్యలపై పోరాటం చేయాలని పిలుపునిచ్చారు.

రాష్ట్రాన్ని సుభిక్షంగా ఉంచాలంటే కేసీఆర్ నాయకత్వమే శ్రీరామరక్ష అని కేటీఆర్ అన్నారు.

ఈ కార్యక్రమానికి చెన్నూరు మాజీ ఎమ్మెల్యే బాల్క సుమన్ అధ్యక్షత వహించారు. ఎమ్మెల్యేలు అనిల్ జాదవ్, కోవ లక్ష్మి మాట్లాడుతూ రాష్ట్ర ప్రభుత్వం పేదలకు ఇచ్చిన హామీలు నెరవేర్చలేదని విమర్శించారు. మాజీ ఎమ్మెల్యేలు, పార్టీ నాయకులు కూడా కార్యక్రమంలో పాల్గొన్నారు.