భారత ప్రభుత్వ స్వదేశీ టెలికాం పరిశోధనా సంస్థ ‘సీ-డాట్’ తన 43వ స్థాపక దినోత్సవాన్ని పురస్కరించుకుని ఆగస్టు 25, 2026న నిర్వహించిన సదస్సులో సరికొత్త విప్లవాత్మక సాంకేతికతలను ఆవిష్కరించింది. టెలికాం రంగంలో భారత్ కేవలం స్వయంసమృద్ధి సాధించడమే కాకుండా, ప్రపంచ దేశాలే భారత్ సాంకేతికతపై ఆధారపడేలా సి-డాట్ అద్భుతాలు సృష్టిస్తోందని కేంద్ర కమ్యూనికేషన్ల మంత్రి జ్యోతిరాదిత్య సింధియా ప్రశంసించారు.ఈ ప్రతిష్టాత్మక వేడుకలలో "బియాండ్ కనెక్టివిటీ: సురక్షితమైన, విశ్వసనీయమైన మరియు ఇంటెలిజెంట్ కమ్యూనికేషన్స్" అనే థీమ్‌తో భారత్ గ్లోబల్ టెలికాం లీడర్‌గా ఎదగడానికి సంబంధించిన అంశాలను వెల్లడించారు.

సీ-డాట్ సాధించిన కీలక విజయాలు మరియు భవిష్యత్తు ప్రణాళికలు:

ప్రపంచాన్ని శాసించేలా 6G దిశగా అడుగులు: గతంలో భారత్ 4G టెక్నాలజీలో ప్రపంచం కంటే వెనుకబడి ఉందని, 5G లో ప్రపంచంతో సమానంగా నడిచిందని, అయితే రాబోయే 6G సాంకేతికతలో ప్రపంచానికే భారత్ నాయకత్వం వహిస్తుందని మంత్రి ధీమా వ్యక్తం చేశారు. 6G ప్రమాణాల రూపకల్పనలో సీ-డాట్ శాస్త్రవేత్తలు ఇప్పటికే చురుకైన పాత్ర పోషిస్తున్నారు.

స్వదేశీ 4G స్టాక్ విజయం: పూర్తిగా భారతదేశంలోనే తయారైన సీ-డాట్ 4G కోర్ సాంకేతికతను ఇప్పటికే దేశవ్యాప్తంగా 1 లక్షకు పైగా బీఎస్ఎన్ఎల్ టవర్లలో విజయవంతంగా అమర్చారు. దీనిని త్వరలోనే 5G కి అప్‌గ్రేడ్ చేయనున్నారు.

14 సరికొత్త క్వాంటం ప్రొడక్ట్స్ విడుదల: భద్రత అత్యంత కీలకమైన ప్రస్తుత డిజిటల్ యుగంలో సైబర్ దాడులను తిప్పికొట్టేందుకు సీ-డాట్ 14 సరికొత్త క్వాంటం సురక్షిత ఉత్పత్తులను ఆవిష్కరించింది. వీటిలో కొన్ని ఇప్పటికే లైవ్ నెట్‌వర్క్‌లలో పనిచేస్తున్నాయి.

సంచార్ సాథి (Sanchar Saathi) యాప్ అద్భుతం: సీ-డాట్ రూపొందించిన ఈ యాప్ ద్వారా ఇప్పటివరకు దేశంలో దాదాపు 36 లక్షల దొంగిలించబడిన మొబైల్ పరికరాలను గుర్తించారు, 57 లక్షల ఫోన్లను బ్లాక్ చేశారు. దీనివల్ల సుమారు ₹4,000 కోట్ల విలువైన ఆర్థిక మోసాలను అరికట్టగలిగారు.

ల్యాబ్ నుండి గ్లోబల్ మార్కెట్లకు : "మేక్ ఇన్ ఇండియా" నుండి "మేక్ ఫర్ ది వరల్డ్" అనే నినాదంతో, భారతదేశంలో తయారైన టెలికాం పరికరాలు మరియు సాంకేతికతలను అంతర్జాతీయ మార్కెట్లలో వాణిజ్యపరంగా విక్రయించడానికి ప్రభుత్వం గ్లోబల్ రోడ్‌మ్యాప్‌ను సిద్ధం చేస్తోంది.

టెలికాం నెట్‌వర్క్ కేవలం ఫోన్ కాల్స్, ఇంటర్నెట్‌కే పరిమితం కాకుండా రక్షణ రంగం, వ్యవసాయం, విపత్తు నిర్వహణ, మరియు సైబర్ సెక్యూరిటీ వంటి కీలక రంగాలకు వెన్నుముకగా మారనుందని సి-డాట్ స్పష్టం చేసింది. ఈ వినూత్న ఆవిష్కరణల ద్వారా 'వికసిత్ భారత్ 2047' లక్ష్య సాధనలో సీ-డాట్ టెక్నాలజీ ప్రపంచ దేశాలు భారత్ వైపు అబ్బురంగా చూసేలా చేస్తోంది.