ప్రధాని నరేంద్ర మోదీ నాలుగు రోజుల విదేశీ పర్యటనలో భాగంగా మంగళవారం కెనడా లోని కాల్గరీ నగరానికి చేరుకున్నారు. అక్కడి కననాస్కిస్ అనే ప్రాంతంలో జరుగుతున్న 51వ జీ-7 శిఖరాగ్ర సమావేశంలో ఆయన పాల్గొంటున్నారు. ఈ సమ్మేళనానికి ఉక్రెయిన్ అధ్యక్షుడు వోలొదిమిర్ జెలెన్స్కీతో పాటు ప్రపంచవ్యాప్తంగా కీలక దేశాల నాయకులు హాజరవుతున్నారు. ఈ సందర్భంగా ప్రధాని మోదీ కెనడా ప్రధాని మార్క్ కార్నీతోపాటు మరిన్ని దేశాల నేతలతో ప్రత్యక్ష సమావేశాలు జరిపే అవకాశముంది.

ఈ రోజు మధ్యాహ్నం జరగనున్న ప్రధాన సమావేశంలో ఆస్ట్రేలియా, బ్రెజిల్, మెక్సికో, దక్షిణాఫ్రికా, దక్షిణ కొరియా వంటి దేశాల ప్రధానులు, అధ్యక్షులు పాల్గొననున్నారు. ప్రపంచ స్థాయిలో ప్రజల భద్రత, ఇంధన వినియోగంలో స్వావలంబన, డిజిటల్ రంగాన్ని మరింత వేగవంతం చేయడం, భవిష్యత్తులో అంతర్జాతీయ భాగస్వామ్యాలను బలోపేతం చేయడం వంటి అంశాలపై ఈ సమావేశంలో చర్చలు జరగనున్నాయి. ఈ శిఖరాగ్ర సమావేశానికి ఇతర దేశ నేతలతో మోదీ మాట్లాడే అవకాశం ఉందని అధికార వర్గాలు తెలిపాయి.

ఇటీవల ప్రధాని మోదీ సైప్రస్ దేశాన్ని సందర్శించారు. ఆ పర్యటనలో భాగంగా సైప్రస్ ప్రభుత్వం ఆయనకు అత్యున్నత గౌరవ పురస్కారాన్ని అందించింది. ఈ ఆతిథ్యానికి కృతజ్ఞతగా ప్రధాని మోదీ తన ఆనందాన్ని వ్యక్తం చేశారు. సైప్రస్ పర్యటన అనంతరం మోదీ కెనడాలో జీ-7 సమావేశానికి హాజరయ్యారు. ఈ రోజు సాయంత్రానికి మోదీ కెనడా నుంచి క్రొయేషియాకు పయనమవుతున్నారు. ఆ పర్యటన ముగిసిన తర్వాత ఆయన తిరిగి భారత్‌కు చేరుకుంటారు.

ఇక ప్రపంచవ్యాప్తంగా ఉన్న ఉద్రిక్త పరిస్థితులు ఈ సదస్సుకు మరింత ప్రాధాన్యతను తీసుకొచ్చాయి. ఇజ్రాయెల్-ఇరాన్ మధ్య యుద్ధ వాతావరణం, ఉక్రెయిన్-రష్యా మధ్య కొనసాగుతున్న ఘర్షణల నేపథ్యంలో, ఈ సమావేశం జరుగుతోంది. అంతేగాక, ఏప్రిల్‌లో జరిగిన పహల్గాం ఉగ్రదాడి అనంతరం మేలో భారత్ చేపట్టిన ఆపరేషన్ "సిందూర్" తర్వాత మోదీ పాల్గొంటున్న తొలి అంతర్జాతీయ సమ్మేళనం ఇది.

ప్రధాని మోదీ జూన్ 15న ఢిల్లీ నుంచి బయలుదేరి మొదట సైప్రస్ వెళ్లారు. ఆ తర్వాత కెనడా పర్యటనకు వెళ్లి ఇప్పుడు క్రొయేషియా చేరుకోనున్నారు. ఈ విదేశీ పర్యటన మూడు ప్రధాన దేశాలపై దృష్టి సారించి, భారత్ తీరును ప్రపంచానికి తెలియజేసేలా ఉంది.

కెనడా పర్యటన మరింత ప్రాధాన్యం సంతరించుకోవడానికి మరో ముఖ్యమైన అంశం ఉంది. 2023లో ఖలిస్థానీ ఉగ్రవాది హర్దీప్ సింగ్ నిజ్జర్ హత్య తర్వాత భారత్-కెనడా మధ్య దౌత్య సంబంధాలు తీవ్రంగా దెబ్బతిన్నాయి. ఇరుదేశాల మధ్య నెమ్మదిగా తిరిగి నమ్మకం ఏర్పడే క్రమంలో మోదీ పర్యటన ఎంతో కీలకంగా భావించబడుతోంది. కెనడా ప్రధాని మార్క్ కార్నీ ఆహ్వానంతో మోదీ ఈ సమావేశానికి హాజరవుతుండడం, భవిష్యత్తులో ఇరుదేశాల మధ్య సంబంధాల పునరుద్ధరణకు దారి తీయొచ్చన్న అంచనాలు వినిపిస్తున్నాయి.

ఈ మొత్తం పర్యటనలో ప్రధానంగా జాతీయ భద్రత, అంతర్జాతీయ సహకారం, డిజిటల్ అభివృద్ధి, ఇంధన భద్రత వంటి అంశాలపై ప్రధానంగా చర్చలు జరగనున్నాయి. ప్రధాని మోదీ ఈ అంతర్జాతీయ వేదికను వినియోగించుకుని భారత్ వైఖరిని ప్రపంచ దేశాల ముందు ఉంచనున్నారు.