భారత ప్రధాని నరేంద్ర మోదీ, దాదాపు 30 ఏళ్ల అనంతరం ఘనా దేశాన్ని సందర్శించిన తొలి భారత ప్రధానిగా చరిత్రలో నిలిచారు. బుధవారం (జూలై 3) ఆయన ఘనా రాజధాని అక్రా నగరానికి చేరుకున్నారు. అక్కడి స్థానిక హోటల్‌ వద్ద ఘన స్వాగతం లభించింది. భారతీయ సంస్కృతిని ప్రతిబింబిస్తూ చిన్నారులు “హరే రామ హరే కృష్ణ” అనే నినాదాలతో, చేతుల్లో భారతదేశ, ఘనా జెండాలతో ఆహ్వానం పలకడం ప్రత్యేక ఆకర్షణగా నిలిచింది. విదేశాల్లో నివసిస్తున్న భారతీయులు పెద్ద సంఖ్యలో ఈ కార్యక్రమానికి హాజరయ్యారు.

ఈ పర్యటన ప్రధాని మోదీ చేపట్టిన ఐదు దేశాల పర్యటనలో మొదటి దశ. ఘనా అధ్యక్షుడు జాన్ డ్రామాని మహామా విమానాశ్రయంలో స్వయంగా ప్రధాని మోదీకి ఆత్మీయ స్వాగతం పలికారు. ఘన స్వాగతంతో పాటు, ప్రధానికి గౌరవ వందనం మరియు 21 తుపాకుల జలులు ఇవ్వడం జరిగింది. పశ్చిమ ఆఫ్రికా దేశమైన ఘనాలో భారత ప్రధానమంత్రికి ఇంత విశిష్ట స్వాగతం లభించడం అరుదైన సంఘటనగా చెప్పుకోవచ్చు.

అక్రాలో జరిగిన ప్రత్యేక కార్యక్రమంలో ఘనా ప్రభుత్వం ప్రధాని మోదీకి అత్యున్నత పౌర పురస్కారం ‘ది ఆఫీసర్ ఆఫ్ ది ఆర్డర్ ఆఫ్ ది స్టార్ ఆఫ్ ఘనా’ను ప్రదానం చేసింది. ఈ గౌరవాన్ని స్వీకరిస్తూ మోదీ ఈ అవార్డును 1.4 బిలియన్ల భారతీయుల తరపున అంకితం చేస్తున్నట్టు చెప్పారు. అలాగే, భారత యువత ఆశలు, భవిష్యత్తు ఆశయాలకు, భారత్–ఘనా మధ్య ఉన్న చారిత్రక సంబంధాలకు ఈ గౌరవాన్ని అంకితమిస్తున్నట్టు తెలిపారు. ఘనా ప్రజలకు, ప్రభుత్వానికి హృదయపూర్వక ధన్యవాదాలు తెలిపారు.

ఈ పర్యటనలో భాగంగా ప్రధాని మోదీ, ఘనా అధ్యక్షుడితో ద్వైపాక్షిక భేటీ జరిపారు. ఇరు దేశాల మధ్య పెట్టుబడి, ఇంధన వనరులు, ఆరోగ్యం, భద్రత వంటి కీలక రంగాలలో భాగస్వామ్యాన్ని బలోపేతం చేయాలని నిర్ణయించారు. ఈ చర్చల అనంతరం నాలుగు కీలక ఒప్పందాలపై అధికారుల మధ్య సంతకాలు జరిగాయి. ఈ సందర్భంగా మోదీ మాట్లాడుతూ, “ఘనాతో మా సంబంధాలు మరింత బలపడాలి. సహకారానికి కొత్త మార్గాలు తెరవాలన్న ఆశ ఉంది” అన్నారు. అలాగే, ప్రజాస్వామ్య వ్యవస్థలు మద్దతుతో పని చేస్తున్న రెండు దేశాల మధ్య సంబంధాలను మరింత విస్తరించేందుకు భారత్ సిద్ధంగా ఉందని చెప్పారు.

ప్రధాని మోదీ తన పర్యటనలో ఘనా పార్లమెంట్‌ను ఉద్దేశించి ప్రసంగించే అవకాశం కూడా పొందనున్నారు. ఇది మోదీకి ఒక విశిష్ట గౌరవంగా భావిస్తున్నారు. ప్రస్తుతం ఘనాలో 15,000 మందికి పైగా భారతీయులు నివసిస్తున్నారు. ఇందులో కొంతమంది నాల్గవ తరం వరకు స్థిరపడిపోయారు. చాలామంది ఘనా పౌరసత్వం కూడా పొందినట్టు సమాచారం.

ఘనా పర్యటన ముగిసిన అనంతరం మోదీ ట్రినిడాడ్ & టొబాగో (జూలై 3–4), అర్జెంటీనా (జూలై 4–5), బ్రెజిల్ (17వ బ్రిక్స్ సమావేశం), నమీబియాల్లో పర్యటించనున్నారు. ఈ బహుళ దేశాల పర్యటనతో భారత్ అంతర్జాతీయ సంబంధాలను మరింత బలోపేతం చేయాలని ప్రధాని లక్ష్యంగా పెట్టుకున్నారు.