అమెరికా అధ్యక్షుడు డొనాల్డ్‌ ట్రంప్‌ మరోసారి ఆసియా దేశాలపై తన ఆగ్రహాన్ని వ్యక్తం చేశారు. ఆసియాలో అమెరికాకు అత్యంత కీలకంగా ఉన్న జపాన్‌, దక్షిణ కొరియాలపై ఆయన 25 శాతం ప్రతీకార సుంకాలను విధించారు. ఈ చర్యలు 2025 ఆగస్టు 1వ తేదీ నుంచి అమల్లోకి రానున్నట్లు ఆయన స్పష్టం చేశారు.

ఈ మేరకు, ట్రంప్‌ స్వయంగా రాసిన లేఖలను తన సామాజిక మాధ్యమం ట్రూత్‌ సోషియల్‌లో ఉంచారు. ఇందులో జపాన్, కొరియా నాయకులపై కఠిన హెచ్చరికలు కనిపించాయి. “మీరు ఎలాంటి కారణాలతోనైనా ప్రతీకార చర్యలు చేపడితే, మేము విధించిన 25 శాతానికి అదనంగా మరిన్ని సుంకాలను విధించబోతున్నాం,” అంటూ ఆయన హెచ్చరించారు.

ఆటోమొబైల్‌, ఎలక్ట్రానిక్స్ పరిశ్రమలే లక్ష్యం

ట్రంప్‌ ఈ సుంకాల ద్వారా జపాన్, దక్షిణ కొరియా ఆటోమొబైల్‌ మరియు ఎలక్ట్రానిక్‌ పరిశ్రమలపై నేరుగా ప్రభావం చూపాలని లక్ష్యంగా పెట్టుకున్నట్లు స్పష్టమవుతోంది. ఈ రంగాల్లో అమెరికాకు భారీగా దిగుమతులు జరుగుతున్న నేపథ్యంలో, స్థానిక తయారీకి ప్రోత్సాహం కల్పించాలన్న ఉద్దేశంతోనే ఈ విధానం అనుసరిస్తున్నట్టు అనిపిస్తోంది.

మిగతా దేశాలకు గడువు పొడిగింపు – భారత్‌కు అవకాశం

ప్రస్తుతం మిగతా దేశాలకు కూడా ట్రంప్‌ ప్రభుత్వం గడువు పెంచింది. జూలై 1తో ముగియాల్సిన సమయం ఇప్పుడు ఆగస్టు 1 వరకూ పొడిగించారు. ఈ లోగా ఒప్పందాల కోసం చర్చలు జరగాల్సిందిగా సూచించారు. భారత్‌ విషయంలోనూ ఇదే వర్తిస్తుంది.

మొదట ఈ ప్రతీకార సుంకాల ప్రకటనా ఈ ఏడాది ఏప్రిల్‌ 2న వెలువడింది. అప్పటినుంచి ప్రపంచ వాణిజ్యంలో గందరగోళం మొదలైంది. అమెరికా నిర్ణయంతో పలు దేశాల మధ్య వాణిజ్య యుద్ధ వాతావరణం ఏర్పడింది. ఫలితంగా స్టాక్‌ మార్కెట్లు కుదేలయ్యాయి. దీన్ని దృష్టిలో ఉంచుకుని ట్రంప్‌ అప్పట్లో 90 రోజుల పాటు ఈ నిర్ణయాన్ని వాయిదా వేశారు.

ఈ గడువు ఇప్పుడు తిరిగి ముగియనుండడంతో, మరోసారి వాణిజ్య ఉద్రిక్తతలు మళ్లీ తెరమీదకి వచ్చాయి. అయితే, భారత్‌–అమెరికా మధ్య చర్చలు కొనసాగుతున్న నేపథ్యంలో, ఒప్పందం కుదిరే అవకాశం ఉందని అంచనాలు వ్యక్తమవుతున్నాయి.

ప్రపంచ ఆర్థిక వ్యవస్థపై ప్రభావం

ఈ తాజా నిర్ణయం మరోసారి ప్రపంచ ఆర్థిక వ్యవస్థను తీవ్రంగా ప్రభావితం చేసే అవకాశం ఉంది. గతంలో వాణిజ్య సుంకాల కారణంగా పలు దేశాల మధ్య వ్యాపార సంబంధాలు బలహీనమయ్యాయి. ఇప్పుడు అదే పరిస్థితి మళ్లీ ఉత్పన్నమవుతుందా అన్న చర్చ మొదలైంది.

అమెరికా ఈ చర్యల ద్వారా చైనాను నిలదీయాలని భావించినా, ఇప్పుడు తన స్నేహిత దేశాలైన జపాన్‌, దక్షిణ కొరియాలపై ఇలాంటి కఠిన చర్యలు తీసుకోవడం గమనార్హం.