ప్రైవేట్‌ ఆస్పత్రుల్లో సిజేరియన్ల దందా..మార్పు వస్తుందా?

Published on: 26 Sep 2025 14:46 IST

జిల్లాలో ప్రైవేట్‌ ఆస్పత్రులు గర్భిణులకు ఇష్టారాజ్యంగా సిజేరియన్‌ ఆపరేషన్లు చేస్తున్నారు. ప్రభుత్వ ఆస్పత్రుల్లో కొంతవరకు సాధారణ ప్రసవాలు జరుగుతున్నప్పటికీ, ప్రైవేట్‌ ఆస్పత్రుల్లో మాత్రం 90% వరకు సిజేరియన్లే జరుగుతున్నాయి.

గర్భిణులు ప్రసవ వేదనతో ఆస్పత్రికి వెళ్తే, “బిడ్డ అడ్డంగా ఉంది”, “ప్రాణానికి ప్రమాదం ఉంది” అనే కారణాలు చూపిస్తూ సిజేరియన్‌ తప్పనిసరి అని చెబుతున్నారు. కొంతమంది వైద్యులు ప్రజల నమ్మకాలను ఆసరాగా తీసుకుని, ముహూర్తం చూసుకుని ఆపరేషన్‌ చేస్తామని చెబుతూ మరింతగా ప్రోత్సహిస్తున్నారు.

నిబంధనలకు విరుద్ధంగా ఈ విధానం కొనసాగుతున్నప్పటికీ, జిల్లావైద్యశాఖ లేదా కలెక్టర్‌ వంటి అధికారులు ఎలాంటి కఠిన చర్యలు తీసుకోవడం లేదు. ఆకస్మిక తనిఖీలు జరగకపోవడంతో, వైద్యులు సిజేరియన్‌ పేరుతో అధిక మొత్తంలో డబ్బులు వసూలు చేస్తున్నారు.

గణాంకాలు చెబుతున్న నిజం

2024-25లో జరిగిన ప్రసవాలు: 28,846
- సాధారణ ప్రసవాలు – 7,183
- సిజేరియన్లు – 21,663
ఈ ఏడాది (ఏప్రిల్‌–ఆగస్టు) ప్రసవాలు: 10,323
- సాధారణ ప్రసవాలు – 2,498
- సిజేరియన్లు – 7,825

అంటే ప్రతి 100 ప్రసవాల్లో 90 వరకు సిజేరియన్లే జరుగుతున్నాయి.

సీఎం సమీక్ష

ఇటీవల రాష్ట్రవ్యాప్తంగా జరిగిన సమీక్షలో సీఎం చంద్రబాబు, “ప్రైవేట్‌ ఆస్పత్రుల్లో సిజేరియన్లు అధికం కావడం ఆందోళనకరం” అంటూ అధికారులను హెచ్చరించారు. సురక్షిత ప్రసవాలకు ప్రాధాన్యత ఇవ్వాలని సూచించారు.