తిరుమల కొండపైనే కాకుండా, కొండ కింద ఉన్న ఆలయాల్లో కూడా గత వైకాపా పాలన సమయంలో అక్రమాలు చోటుచేసుకున్నాయన్న ఆరోపణలు ఒక్కొక్కటిగా వెలుగులోకి వస్తున్నాయి. ఇప్పటికే తిరుమలలో పరకామణి వ్యవహారం, కల్తీ నెయ్యి వినియోగం, వస్త్రాల కొనుగోళ్లలో అవినీతి అంశాలపై విచారణ కొనసాగుతుండగా… తాజాగా తిరుపతిలోని శ్రీ గోవిందరాజస్వామి ఆలయం విషయంలో సంచలన ఆరోపణలు తెరపైకి వచ్చాయి.

ఆలయ విమాన గోపురం పనుల సందర్భంగా దాదాపు 50 కిలోల బంగారం మాయమైందన్న అనుమానాలతో దేవస్థానం విజిలెన్స్ విభాగం లోతైన విచారణ చేపట్టింది. ఈ వ్యవహారంలో 30 విగ్రహాలు ధ్వంసమయ్యాయన్న ఆరోపణలు కూడా బయటకు రావడం కలకలం రేపుతోంది.

బంగారు తాపడం పేరుతో అనుమానాస్పద వ్యవహారం

తిరుపతిలోని శ్రీ గోవిందరాజస్వామి ఆలయం చారిత్రకంగా, ఆధ్యాత్మికంగా ఎంతో ప్రాముఖ్యత కలిగిన క్షేత్రం. వైకాపా ప్రభుత్వం అధికారంలో ఉన్న 2022–23 మధ్యకాలంలో, ఈ ఆలయ విమాన గోపురానికి బంగారు తాపడం చేయాలని నిర్ణయం తీసుకున్నారు. ఇందుకోసం తిరుమల తిరుపతి దేవస్థానం (టీటీడీ) సుమారు 100 కిలోల బంగారాన్ని కేటాయించినట్లు సమాచారం.

నియమాల ప్రకారం విమాన గోపురంపై తొమ్మిది పొరలుగా బంగారు తాపడం చేయాల్సి ఉండగా, కేవలం రెండు పొరలకే పనులు పరిమితం చేసినట్లు ఆరోపణలు ఉన్నాయి. దీంతో దాదాపు సగం వరకు బంగారం వాడకుండా మాయం చేసినట్టుగా అనుమానాలు వ్యక్తమవుతున్నాయి.

విగ్రహాల ధ్వంసం… పనులపై గోప్యత?

విమాన గోపురంపై ఉన్న 30 విగ్రహాలను తొలగించి లేదా ధ్వంసం చేసి, అనంతరం బంగారు తాపడం పనులు చేపట్టారన్న ఆరోపణలు అప్పట్లోనే వినిపించాయి. అయితే ఈ విషయం బయటకు రాకుండా అప్పటి టీటీడీ పాలకులు జాగ్రత్తలు తీసుకున్నారన్న ప్రచారం ఉంది.

అప్పటి టీటీడీ ఛైర్మన్ వై.వి. సుబ్బారెడ్డి, ఈవోగా ఉన్న ధర్మారెడ్డి ఈ వ్యవహారాన్ని గోప్యంగా ఉంచేందుకు ప్రయత్నించారన్న ఆరోపణలు కూడా వినిపిస్తున్నాయి. అంతేకాదు, విమాన గోపురం పనులను చేపట్టాల్సిన అసలు కాంట్రాక్టర్‌ను పక్కన పెట్టి, సబ్ లీజ్ పేరుతో ఇతరులకు పనులు అప్పగించారన్న ఫిర్యాదులు కూడా దేవస్థానానికి అందినట్లు సమాచారం.

విజిలెన్స్ లోతైన విచారణ

ఈ మొత్తం వ్యవహారంపై ప్రస్తుతం టీటీడీ విజిలెన్స్ విభాగం సమగ్ర విచారణ చేపట్టింది. అప్పట్లో ఫిర్యాదులు చేసిన వ్యక్తుల నుంచి వివరాలు సేకరిస్తూ, ఆధారాలను పరిశీలిస్తోంది. అలాగే బంగారు తాపడం పనులు చేసిన కార్మికులను కూడా ప్రశ్నించి…

• నిజంగా ఎన్ని విగ్రహాలు ధ్వంసం అయ్యాయి?

• విమాన గోపురానికి ఎంత బంగారం వాడారు?

• మిగిలిన బంగారం ఏమైంది?

అనే అంశాలపై స్పష్టత తెచ్చే ప్రయత్నం చేస్తోంది.

ఈ విచారణలో ఏ మేరకు నిజాలు వెలుగులోకి వస్తాయన్నది ఆసక్తికరంగా మారింది. ఆలయాల పవిత్రతకు భంగం కలిగించే ఇలాంటి ఆరోపణలు భక్తుల్లో తీవ్ర ఆందోళన కలిగిస్తున్నాయి.