పెట్రోల్ బంకుల నుంచి భారీ (బల్క్) కొనుగోళ్లపై కేంద్ర ప్రభుత్వం 90 రోజుల పాటు తాత్కాలిక నిషేధం/ఆంక్షలు విధిస్తూ కీలక నిర్ణయం తీసుకుంది. పశ్చిమాసియా సంక్షోభం, అంతర్జాతీయంగా ముడుచమురు సరఫరా వ్యవస్థలో తలెత్తిన అంతరాయాల నేపథ్యంలో ఈ నిర్ణయం తీసుకున్నట్లు కేంద్ర పెట్రోలియం మరియు సహజ వాయువు మంత్రిత్వ శాఖ "మోటార్ స్పిరిట్ అండ్ హై స్పీడ్ డీజిల్ ఆర్డర్, 2026"ను జారీ చేసింది. 

బల్క్ కొనుగోళ్లపై బ్రేక్: పరిశ్రమలు, వాణిజ్య సంస్థలు, మాల్స్, ప్రైవేట్ రవాణా సంస్థలు, కమర్షియల్ కాంప్లెక్స్‌లు ఇకపై సాధారణ రిటైల్ పెట్రోల్ బంకుల నుంచి పెద్ద మొత్తంలో ఇంధనాన్ని కొనుగోలు చేయకూడదు. 

సరఫరా పరిమితి: సాధారణ రిటైల్ బంకుల్లో ఒక వాహనానికి లేదా అనుమతించిన కంటైనర్‌కు రోజుకు గరిష్టంగా 200 లీటర్ల డీజిల్ మాత్రమే పోయాలి. 

రీసేల్ నిషేధం: బంకుల నుంచి కొనుగోలు చేసిన ఇంధనాన్ని తిరిగి ఇతరులకు విక్రయించడం పూర్తిగా నేరం. 

కొనుగోలు మార్గం: పారిశ్రామిక, వాణిజ్య వినియోగదారులు తమ అవసరాల కోసం నేరుగా ఆయిల్ మార్కెటింగ్ కంపెనీల అధీకృత బల్క్ సప్లై ఛానెళ్ల ద్వారానే మార్కెట్ ధరలకు ఇంధనాన్ని బుక్ చేసుకోవాలి. 

భారీ ధరల తేడా: సాధారణ సామాన్య వినియోగదారులపై భారం పడకుండా ప్రభుత్వం రిటైల్ ధరలను నియంత్రించింది. ఉదాహరణకు ఢిల్లీలో రిటైల్ బంకుల్లో లీటర్ డీజిల్ ధర రూ.95.20 ఉండగా, ఇండస్ట్రియల్/బల్క్ వినియోగదారులకు మార్కెట్ ధర రూ.134.50 గా ఉంది. 

రిటైల్ బంకుల్లో అసాధారణ రద్దీ: ఈ ధరల వ్యత్యాసం (దాదాపు రూ.39 తేడా) వల్ల భారీ పరిశ్రమలు, టెలికాం టవర్ల నిర్వాహకులు, ఫ్యాక్టరీల వారు నేరుగా రిటైల్ బంకులకు వచ్చి ట్యాంకర్ల ద్వారా తక్కువ ధరకు ఇంధనాన్ని తరలించడం ప్రారంభించారు. 

దీనివల్ల సాధారణ సామాన్యులకు ఇంధన కొరత ఏర్పడే ప్రమాదం ఉండటంతో కేంద్రం ఈ ఆంక్షలు విధించింది. సాధారణ ద్విచక్ర వాహనాలు, కార్లు మరియు సాధారణ ప్రజల రోజువారీ అవసరాలకు ఎలాంటి ఇబ్బందులు లేకుండా ఈ చర్యలు తీసుకున్నట్లు ప్రభుత్వం స్పష్టం చేసింది.