తెలంగాణ రాజకీయాల్లో బీఆర్‌ఎస్ పార్టీకి సంబంధించిన ఒక ముఖ్యమైన అంశం ప్రస్తుతం తీవ్ర చర్చకు దారి తీస్తోంది. పార్టీ ఎమ్మెల్సీ కల్వకుంట్ల కవితపై జరుగుతున్న వివాదాలు మరియు ప్రచారం రాష్ట్ర రాజకీయ వర్గాల్లో హాట్ టాపిక్‌గా మారాయి. ఈ నేపథ్యంలో పార్టీ అధినేత, మాజీ ముఖ్యమంత్రి కేసీఆర్‌ ఒక కీలక నిర్ణయం తీసుకున్నట్టు సమాచారం.

పార్టీకి సంబంధించి జరుగుతున్న ఆరోపణలు, భిన్నాభిప్రాయాలపై స్పందించొద్దని కేసీఆర్‌ తనయుడు, బీఆర్‌ఎస్ వర్కింగ్ ప్రెసిడెంట్ కేటీఆర్‌కు సూచించినట్లు సమాచారం. కవిత వ్యవహారంపై మీడియా స్పందనలు, బహిరంగ వ్యాఖ్యల వల్ల పార్టీ క్యాడర్‌లో గందరగోళం ఏర్పడుతున్నట్లు కేసీఆర్ అభిప్రాయపడ్డారని సమాచారం. ఈ విషయంలో తొందరపడి వ్యాఖ్యలు చేయకుండా పార్టీ పరిపక్వతను చూపాలని ఆయన స్పష్టం చేసినట్లు తెలిసింది.

ఆదివారం కేటీఆర్‌ ఎర్రవల్లిలోని కేసీఆర్‌ ఫామ్‌హౌస్‌కు వెళ్లారు. మధ్యాహ్నం 2 గంటలకు అక్కడికి చేరిన కేటీఆర్, నేరుగా పై అంతస్తులో ఉన్న కేసీఆర్ గదిలోకి వెళ్లి దాదాపు మూడు గంటలపాటు చర్చించారు. ఈ సమావేశంలో ప్రధానంగా కవిత వివాదం, కాళేశ్వరం ప్రాజెక్టుపై వచ్చిన నోటీసులు, పార్టీలోని అంతర్గత అంశాలు, భవిష్యత్ కార్యాచరణపై చర్చ జరిగినట్లు తెలిసింది.

కేసీఆర్ పార్టీని మరింత బలోపేతం చేయడానికి కేటీఆర్‌కు కొన్ని కీలక సూచనలు చేసినట్లు సమాచారం. రానున్న రోజుల్లో సభ్యత్వ నమోదు ప్రక్రియను వేగవంతం చేయాలని, అలాగే పార్టీలో కొత్త కమిటీల ఏర్పాటుపై దృష్టి పెట్టాలని సూచించారు. జూన్ రెండో వారంలో సభ్యత్వ నమోదు మరియు కమిటీల ఏర్పాటుకు సంబంధించిన షెడ్యూల్ విడుదల చేయాలని నిర్ణయించినట్లు సమాచారం.డిజిటల్ సభ్యత్వ నమోదు కోసం రూపొందిస్తున్న యాప్, సాంకేతిక సదుపాయాలపై కేసీఆర్ సమీక్ష నిర్వహించి, అవి సక్రమంగా అమలవ్వాలన్న ఆదేశాలు జారీ చేసినట్లు సమాచారం.

బీఆర్‌ఎస్ పార్టీ స్థాపనకు 25 సంవత్సరాలు పూర్తయిన సందర్భంగా అమెరికాలోని డల్లాస్‌లో జూన్ 1న ఏర్పాటు చేసిన రజతోత్సవ సభలో పాల్గొనడానికి కేటీఆర్ ఈ నెల 28న హైదరాబాద్‌ నుంచి బయలుదేరనున్నారని సమాచారం. ఈ సభలో ప్రసంగించాల్సిన అంశాలు, సభ అనంతరం అమెరికాలోని ప్రవాస తెలంగాణ వాసులతో భేటీపై కూడా కేసీఆర్‌తో కేటీఆర్ చర్చించినట్లు తెలుస్తోంది.

తెలంగాణ ఆవిర్భావ వేడుకలను జూన్ 2న తెలంగాణ భవన్‌లో నిర్వహించాలని కేసీఆర్ నిర్ణయించినట్లు సమాచారం. ఆ రోజు జాతీయ పతాకాన్ని శాసన మండలిలో ప్రతిపక్ష నేత మధుసూదనాచారి ఆవిష్కరించాలని నిర్ణయించారు. ఇక జూన్ 5న కాళేశ్వరం కమిషన్ విచారణకు కేసీఆర్‌కి నోటీసులు వచ్చాయి. ఈ అంశంపై న్యాయ నిపుణుల సలహాలతో తదుపరి నిర్ణయం తీసుకోవాలని చర్చించినట్లు తెలుస్తోంది.

రాష్ట్ర రాజకీయాల్లో వచ్చే మార్పులు, జాతీయ స్థాయిలో పార్టీ వ్యూహాలపై కూడా ఈ భేటీలో కేసీఆర్, కేటీఆర్ సుదీర్ఘంగా చర్చించినట్లు సమాచారం. సాయంత్రం 6 గంటలకే కేటీఆర్ హైదరాబాద్‌కి తిరిగి వెళ్లారు.

ఈ మొత్తం సమావేశానికి సంబంధించిన అంశాలపై పూర్తి గోప్యత పాటించారని, ఫామ్‌హౌస్‌లో ఎవరూ పై అంతస్తు వెళ్లకుండా ముందుగానే ఆదేశాలు ఇచ్చినట్లు సమాచారం.