మధ్యప్రదేశ్ రాష్ట్రంలో మరొక సంచలనాత్మక కుంభకోణం వెలుగు చూసింది. రాష్ట్ర ప్రభుత్వ విభాగాల్లో పని చేస్తున్నట్టు కేవలం కాగితాలపై కనిపిస్తున్న 50 వేల మంది ఉద్యోగుల పేరుతో సుమారు రూ.230 కోట్ల విలువైన జీతాలు మాయం అయినట్టు ఆరోపణలు వెల్లువెత్తుతున్నాయి. అధికారికంగా ఉద్యోగుల పేర్లు, ఎంప్లాయ్ కోడ్‌లు ఉండి కూడా.. అసలు వారే హాజరు కాలేదంటే ఈ వ్యవహారం ఏ స్థాయిలో ఉందో అర్థం చేసుకోవచ్చు.

ఈ కేసు మొదట వెలుగులోకి వచ్చిందీ.. గత ఆరు నెలలుగా అంటే 2024 డిసెంబర్ నుంచి, 50 వేల మందికి పైగా ప్రభుత్వ ఉద్యోగులకు జీతాలు అందకపోవడంతో. రికార్డుల ప్రకారం వారు ప్రభుత్వ ఉద్యోగులే అయినప్పటికీ, వారికి జీతాలు చెల్లించని పరిస్థితి ఆందోళనకు గురిచేసింది. ఈ పరిణామంపై ఖచ్చితమైన సమాచారం సేకరించేందుకు మధ్యప్రదేశ్‌ ట్రెజరీ అండ్ అకౌంట్స్ డిపార్ట్‌మెంట్ రంగంలోకి దిగింది.

ఈ 50 వేల మందిలో వాస్తవంగా పనిచేస్తున్నవారు ఎంతమంది? సెలవుల్లో ఉన్నారా? విధుల నుంచి సస్పెండ్ అయ్యారా? లేక కేవలం ఫేక్ పేర్లా? అన్నది తెలియక అధికారులు తలపట్టుకుంటున్నారు. దీనిపై స్పష్టత తీసుకురావాలని, మొత్తం 6 వేల మందికి పైగా డ్రాయింగ్ అండ్ డిస్బర్సింగ్ ఆఫీసర్లకు (DDOs) లేఖలు పంపించారు. అందులో 15 రోజుల్లోగా సమగ్ర నివేదిక ఇవ్వాలని ఆదేశించారు.

ఈ పథకంలో మోసం జరిగిందా లేదా అన్నది త్వరలోనే తేలనుంది. ప్రస్తుతానికి దర్యాప్తు కొనసాగుతోంది. డీడీవోలు తమ జవాబులు సమర్పించిన తర్వాత ఎన్ని నకిలీ ఉద్యోగులు ఉన్నారు, ఎంతమంది వాస్తవంగా ఉన్నారు అన్నదానిపై స్పష్టత వస్తుందని అధికారులు చెబుతున్నారు. ప్రభుత్వ నిధులను దుర్వినియోగం చేసినట్లు తేలితే, కఠిన చర్యలు తప్పవని సంకేతాలు ఉన్నాయి.

ఈ అంశంపై ఆర్థిక శాఖ మంత్రి జగదీశ్ దేవ్డా స్పందిస్తూ, ‘‘ప్రభుత్వం చేపట్టిన అన్ని చర్యలు నిబంధనలకు అనుగుణంగానే జరుగుతున్నాయి. ఎలాంటి తప్పిదం జరుగకుండా చర్యలు తీసుకుంటాం’’ అని హామీ ఇచ్చారు. ప్రజాధనానికి penny కూడా వృథా కాకూడదన్న ధోరణితో ప్రభుత్వం ముందుకెళ్తుందని చెప్పారు.