నానో కంటే బుల్లి కారు.. హీరో నోవస్ పేరుతో త్వరలో విడుదల

హీరో మోటోకార్ప్‌ నుంచి కొత్త సంచలనం – ‘నోవస్’ మైక్రో ఎలక్ట్రిక్ వాహనం ఆవిష్కరణ

Published on: 06 Nov 2025 16:56 IST

దేశంలోని అగ్రగామి టూవీలర్ తయారీదారైన హీరో మోటోకార్ప్ ఇప్పుడు ఎలక్ట్రిక్‌ వాహనాల రంగంలో మరో కొత్త అధ్యాయాన్ని ప్రారంభించింది. కంపెనీకి చెందిన ఎమర్జింగ్ మొబిలిటీ యూనిట్‌ ‘VIDA’ నుంచి తాజాగా ‘నోవస్’ (Novus) అనే సరికొత్త మైక్రో ఎలక్ట్రిక్ ఫోర్‌-వీలర్ను పరిచయం చేసింది. కేవలం బైక్‌లు, స్కూటర్లకే పరిమితం కాకుండా భవిష్యత్ రవాణా అవసరాలను దృష్టిలో పెట్టుకుని హీరో ఈ కొత్త ప్రయాణాన్ని మొదలుపెట్టింది.

ఇటలీలోని మిలన్‌లో జరుగుతున్న ప్రపంచ స్థాయి ద్విచక్ర వాహనాల ప్రదర్శన EICMA 2025 వేదికగా ఈ వాహనాన్ని కంపెనీ ఆవిష్కరించింది. ఈ సందర్భంగా హీరో మోటోకార్ప్ పలు కొత్త మొబిలిటీ కాన్సెప్ట్లను కూడా ప్రదర్శించింది.

హీరో VIDA ప్రదర్శించిన కొత్త ఉత్పత్తులు

NEX 1: తేలికపాటి, మోసుకెళ్లదగిన వాహనం. చిన్న దూర ప్రయాణాలు, కాలేజీ లేదా ఇండస్ట్రియల్ క్యాంపస్‌లకు అనుకూలంగా ఉంటుంది.
NEX 2: మూడు చక్రాల ఎలక్ట్రిక్ ట్రైక్‌. ఇది ప్రధానంగా డెలివరీలు, నగరంలోని తక్కువ దూర ప్రయాణాలకు సరిపోతుంది.
NEX 3: ఈ శ్రేణిలో అత్యంత ప్రధానమైన ‘నోవస్’ మోడల్‌. ఇది నాలుగు చక్రాల మైక్రో ఎలక్ట్రిక్ వాహనం. ఇద్దరు సౌకర్యవంతంగా ప్రయాణించగలరు. చిన్న పట్టణాల రవాణా అవసరాలకు ఇది అనువైన ఎంపికగా నిలవనుంది.

హీరో మోటోకార్ప్ ఎగ్జిక్యూటివ్ ఛైర్మన్ పవన్ ముంజాల్ మాట్లాడుతూ, “‘నోవస్’ కొత్త శక్తి, సృజనాత్మకతకు ప్రతీక. రాబోయే కాలంలో ప్రపంచ రవాణా మార్పులకు ఇది దారి చూపుతుంది” అని పేర్కొన్నారు. ఆయన అభిప్రాయం ప్రకారం, NEX 3 వాహనం పట్టణ, గ్రామీణ ప్రాంతాల ప్రయాణాలకు సరిపోయే ‘ఆల్ వెదర్ పర్సనల్ ఈవీ’గా నిలుస్తుంది, భద్రతతో పాటు సౌకర్యాన్ని అందిస్తుంది.

మొత్తంగా, హీరో మోటోకార్ప్ ‘నోవస్’ ద్వారా ఎలక్ట్రిక్ మొబిలిటీ రంగంలో కొత్త దిశను చూపించిందని పరిశ్రమ వర్గాలు విశ్లేషిస్తున్నాయి.