తెలంగాణలో పెట్టుబడుల ప్రవాహం వేగంగా పెరుగుతోంది. “తెలంగాణ రైజింగ్” గ్లోబల్‌ సమ్మిట్‌ వేదికగా రాష్ట్రంలో పెట్టుబడులు పెట్టేందుకు దేశీ–విదేశీ కంపెనీలు భారీ ఆసక్తి చూపుతున్నాయి. ఇప్పటికే 14 ప్రముఖ సంస్థలు రూ.లక్ష కోట్లకు మించిన పెట్టుబడులతో ముందుకొచ్చాయి. వీటితో పాటు మరో 30కు పైగా ప్రాజెక్టులకు సంబంధించిన ప్రతిపాదనలు తుది దశలో ఉన్నాయి. సమ్మిట్‌ ప్రారంభానికి ఇంకా కొన్ని రోజులు ఉండటంతో పెట్టుబడుల సంఖ్య, మొత్తాలు మరింత పెరగే అవకాశముందని అధికారులు భావిస్తున్నారు.

ఫ్యూచర్‌ సిటీలో ప్రతిపాదిస్తున్న ప్రాజెక్టులు రాష్ట్రానికి కొత్త గుర్తింపునివ్వనున్నాయి. రిలయన్స్‌ గ్రూప్‌ గుజరాత్‌లో అభివృద్ధి చేసిన వంతారా జూ తరహాలో ఇక్కడ కూడా ఒక ప్రపంచస్థాయి జంతు సంరక్షణ కేంద్రాన్ని ఏర్పాటు చేసే ఆలోచనలో ఉంది. ఐటీ రంగంలో టీసీఎస్‌ సంస్థ, టీపీజీ భాగస్వామ్యంతో సుమారు రూ.70 వేల కోట్ల పెట్టుబడితో అత్యాధునిక హైపర్‌వాల్ట్‌ డేటా సెంటర్లను నెలకొల్పనుంది. ఈ ప్రాజెక్టులు తెలంగాణను డిజిటల్‌ మౌలిక సదుపాయాల కేంద్రంగా మార్చనున్నాయని భావిస్తున్నారు.

పరిశ్రమలతోపాటు పర్యాటకం, వినోదం, క్రీడలు, సినిమా రంగాల్లోనూ పెట్టుబడులు రాబోతున్నాయి. ఇప్పటికే ప్రభుత్వం బుధవారం నాటికి దాదాపు రూ.లక్ష కోట్ల పెట్టుబడులకు అధికారిక ఆమోదం తెలిపింది. ఈ నెల 8, 9 తేదీల్లో ఫ్యూచర్‌ సిటీలో జరగనున్న తెలంగాణ రైజింగ్‌ గ్లోబల్‌ సమ్మిట్‌లో ముఖ్యమంత్రి రేవంత్‌రెడ్డి సమక్షంలో పలు కంపెనీలతో పరస్పర అవగాహన ఒప్పందాలు కుదుర్చుకోనున్నారు.

విదేశీ కంపెనీలను ఆకర్షించేందుకు ఫ్యూచర్‌ సిటీలో ప్రత్యేక పారిశ్రామిక వాడలు ఏర్పాటు చేయాలని ప్రభుత్వం నిర్ణయించింది. ముఖ్యంగా తైవాన్‌, సింగపూర్‌, వియత్నాం దేశాలకు చెందిన పరిశ్రమల కోసం ప్రత్యేక ఇండస్ట్రియల్‌ పార్కులు రూపొందించనున్నారు. అలాగే తెలంగాణను అంతర్జాతీయ సినిమా షూటింగ్‌లకు కేంద్రంగా మార్చాలన్న లక్ష్యంతో ప్రపంచస్థాయి ఫిల్మ్ ఫెసిలిటీ ఏర్పాటుకు బాలీవుడ్‌ నటుడు అజయ్‌ దేవ్‌గన్‌ ముందుకు వచ్చారు. హిందూస్థాన్‌ యూనిలీవర్‌ సంస్థ కూడా ఉత్పత్తి విస్తరణలో భాగంగా కొత్త ప్లాంట్‌ ఏర్పాటుకు సిద్ధమవుతోంది.

ఏఐకు ప్రత్యేక ప్రాధాన్యం ఇస్తున్న తెలంగాణ ప్రభుత్వం ఫ్యూచర్‌ సిటీలో 100 ఎకరాల్లో ఏఐ సిటీ ఏర్పాటు చేయాలని ఇప్పటికే ప్రకటించింది. ఇందులో భాగంగా ఏఐ యూనివర్సిటీకి అనుమతులు ఇచ్చింది. ‘ప్రజ్ఞా ఏఐ’ సంస్థ రీసెర్చ్‌ అండ్‌ ఇన్నోవేషన్‌ యూనివర్సిటీ ఏర్పాటు చేయనుండగా, లండన్‌ యూనివర్సిటీ కూడా హైదరాబాద్‌లో తన ఆఫ్‌షోర్‌ క్యాంపస్‌ను నెలకొల్పనుంది. ఇవన్నీ రాష్ట్రాన్ని నాలెడ్జ్‌, టెక్నాలజీ హబ్‌గా తీర్చిదిద్దేందుకు దోహదపడనున్నాయి.

తెలంగాణ రైజింగ్‌ సమ్మిట్‌కు దేశ విదేశాల నుంచి పెద్ద సంఖ్యలో ప్రముఖులు తరలివచ్చే సూచనలు ఉన్నాయి. పారిశ్రామికవేత్తలు, ఐటీ దిగ్గజాలు, సినీ ప్రముఖులు, క్రీడా రంగానికి చెందిన ప్రముఖులు సహా వివిధ రంగాల నిపుణులకు ప్రభుత్వం వేల సంఖ్యలో ఆహ్వానాలు పంపింది. అదానీ, రిలయన్స్‌, మహీంద్రా, బయోకాన్‌, హ్యుందాయ్‌, టీవీఎస్‌ వంటి ప్రముఖ గ్రూపుల ప్రతినిధులతో పాటు అంతర్జాతీయ వ్యాపార సంస్థల కీలక నేతలు హాజరుకానున్నారు. ఈ సమ్మిట్‌ తెలంగాణకు ప్రపంచ స్థాయిలో పెట్టుబడుల గమ్యస్థానంగా గుర్తింపు తెచ్చే కీలక ఘట్టంగా మారనున్నదని ప్రభుత్వం ఆశిస్తోంది.