తెలంగాణ ప్రజల ఆరాధ్య దైవమైన సమ్మక్క–సారలమ్మ తల్లుల మేడారం మహాజాతర నేటి నుంచి ఘనంగా ప్రారంభమవుతోంది. రెండేళ్లకోసారి జరిగే ఈ జాతర దేశంలోనే అతిపెద్ద గిరిజన ఆధ్యాత్మిక వేడుకగా గుర్తింపు పొందింది. బుధవారం మొదలై జనవరి 31 వరకు నాలుగు రోజుల పాటు ఈ మహాజాతర వైభవంగా కొనసాగనుంది.

ఈ జాతరకు ప్రభుత్వం విస్తృత ఏర్పాట్లు చేసింది. సుమారు రూ.251 కోట్ల వ్యయంతో సమ్మక్క–సారలమ్మ గద్దెల ప్రాంగణాన్ని ఆధునిక సౌకర్యాలతో పునర్నిర్మించింది. భక్తులకు అవసరమైన తాగునీరు, వైద్య సేవలు, రహదారులు, విద్యుత్, పారిశుధ్య ఏర్పాట్లను పూర్తిస్థాయిలో అందుబాటులోకి తీసుకొచ్చింది.

సారలమ్మ ఆగమనంతో మొదలు

మహాజాతరలో తొలి ఘట్టంగా సారలమ్మ జాతర జరుగుతుంది. ఈ రోజు సాయంత్రం గద్దెలపైకి సారలమ్మతో పాటు పగిడిద్దరాజు, గోవిందరాజు దేవతల ఆగమనం జరగనుంది.

• కన్నెపల్లి నుంచి సారలమ్మ

• పూనుగొండ్ల నుంచి పగిడిద్దరాజు

• కొండాయి నుంచి గోవిందరాజు

ప్రతిరూపాలను ఆదివాసీ పూజారులు సంప్రదాయబద్ధంగా గద్దెలపై ప్రతిష్ఠించనున్నారు.

కొండాయి, పూనుగొండ్ల ప్రాంతాల నుంచి పూజారులు కాళీ నడకన మేడారం వైపు ప్రయాణం ప్రారంభించారు. ముఖ్యంగా పగిడిద్దరాజు పూజారులు సుమారు 65 కిలోమీటర్లు నడుచుకుంటూ మేడారం చేరుకుంటుండటం విశేషం. సాయంత్రం అధికారికంగా మంత్రులు సీతక్క, కొండా సురేఖతో పాటు జిల్లా కలెక్టర్ దేవతలకు ఘన స్వాగతం పలకనున్నారు.

కోటి మందికి పైగా భక్తుల రాక అంచనా

ఈసారి తెలంగాణతో పాటు దేశం నలుమూలల నుంచి కోటి మంది వరకు భక్తులు తరలివచ్చే అవకాశం ఉందని అధికారులు అంచనా వేస్తున్నారు. ఇప్పటికే నెల రోజుల నుంచే భక్తుల రాక మొదలైందని, ఇప్పటివరకు సుమారు 50 లక్షల మంది దర్శనం చేసుకున్నారని అధికారులు తెలిపారు.

తొలిసారిగా ఏఐ సాంకేతికత వినియోగం

భారీ జనసంద్రాన్ని దృష్టిలో పెట్టుకొని ఈసారి పోలీసులు ఆధునిక సాంకేతికతను ఉపయోగిస్తున్నారు.
 తప్పిపోయిన చిన్నారులను గుర్తించేందుకు కృత్రిమ మేధ (AI) ఆధారిత వ్యవస్థను తొలిసారిగా అమలు చేస్తున్నారు.
 సీసీటీవీ నిఘా, డ్రోన్ పర్యవేక్షణతో భద్రతను మరింత బలోపేతం చేశారు.

21 శాఖల సమన్వయంతో ఏర్పాట్లు

మేడారం మహాజాతరకు

• రహదారులు & భవనాలు

• పంచాయతీరాజ్

• నీటిపారుదల

• విద్యుత్

• గిరిజన సంక్షేమం

• దేవాదాయ శాఖ

• పోలీస్

• ఆర్టీసీ

• వైద్య, అగ్నిమాపక శాఖలు

సహా మొత్తం 21 ప్రభుత్వ శాఖలు సమన్వయంతో పనిచేస్తున్నాయి. భక్తులకు ఎలాంటి ఇబ్బందులు కలగకుండా అన్ని ఏర్పాట్లు పూర్తయ్యాయని అధికారులు చెబుతున్నారు.

భక్తి, సంప్రదాయం, విశ్వాసం కలసిన మహోత్సవం

సమ్మక్క–సారలమ్మ తల్లుల మహాజాతర కేవలం ఆధ్యాత్మిక వేడుక మాత్రమే కాదు… గిరిజన సంస్కృతి, సంప్రదాయాల ప్రతిబింబం. అడవుల మధ్య జరిగే ఈ అపూర్వ జాతర మరోసారి కోట్లాది మందిని ఒకే చోటుకు చేర్చనుంది.