పాస్టర్ ప్రవీణ్ కుమార్ మృతిపై కొత్త వివరాలు

పాస్టర్ ప్రవీణ్ కుమార్ ఒక వైన్ షాపు వద్ద మద్యం కొనుగోలు చేస్తున్నట్లు కనిపించే వీడియో సోషల్ మీడియాలో వైరల్ అవుతోంది. అలాగే, ఆయన రోడ్డుపక్కన వాహనాన్ని ఆపి కూర్చున్న ఫోటోలు కూడా వైరల్ అవుతున్నాయి.

ఈ సీసీటీవీ ఫుటేజ్‌ను ఎవరు విడుదల చేశారనే విషయంపై స్పష్టత లేదు. అయితే, ఈ కేసును పరిశీలిస్తున్న ఏలూరు మరియు తూర్పు గోదావరి పోలీసులు,  ఈ ఫుటేజ్‌లు తాము రిలీజ్ చేయలేదని స్పష్టం చేశారు.

ఈ కేసు దర్యాప్తులో భాగంగా, తూర్పు గోదావరి జిల్లా ఎస్పీ మరియు ఏలూరు ఐజీ మీడియా సమావేశంలో పలు సీసీటీవీ ఫుటేజ్‌ను ప్రదర్శించారు.

ప్రవీణ్ కుమార్ మార్చి 24న హైదరాబాద్‌ నుంచి బుల్లెట్ బైక్‌పై బయలుదేరారు. ఆ రాత్రి 11.42 గంటలకు తూర్పుగోదావరి జిల్లా కొంతమూరు వద్ద రహదారిలో ఆయన ప్రమాదానికి గురైనట్లు సీసీటీవీ ఫుటేజ్‌లో కనిపించింది.

మార్చి 25 తెల్లవారుజామున స్థానికులకు రహదారి పక్కన గాయాలతో మృతదేహం కనిపించింది. పోలీసులకు సమాచారం ఇచ్చారు. అప్పటికే ప్రవీణ్ కుమార్ మృతి చెందినట్లు గుర్తించారు.

పోలీసులు ఆయన ప్రయాణించిన మార్గాన్ని పరిశీలించి, హైదరాబాద్ నుంచి రాజమహేంద్రవరం వరకు వివిధ ప్రాంతాల్లోని 300 సీసీటీవీ ఫుటేజ్‌ను సేకరించారు.

ప్రమాదానికి ముందు, కొవ్వూరు టోల్ గేట్ వద్ద ఆయన బైక్ నడుపుతున్న దృశ్యాలు రికార్డ్ అయ్యాయి. అయితే, విజయవాడ మహానాడు జంక్షన్ దాటాక రామవరప్పాడు వద్ద ఆయన సీసీటీవీ ఫుటేజ్‌లో కనిపించలేదు. దీంతో పోలీసులు ఆయన మార్గాన్ని పరిశీలించారు.

ఒక ఆటో డ్రైవర్ సమాచారం మేరకు, ట్రాఫిక్ ఎస్ఐ సుబ్బారావు ఆయనను రోడ్డు పక్కన పడి ఉన్నట్లు గమనించారు. వెంటనే అతడిని పైకి లేపి, నీళ్లు ఇచ్చి విశ్రాంతి తీసుకునేలా చేశారు. ఆయన బైక్ హెడ్‌లైట్ పగిలి వేలాడుతూ కనిపించిందని, రిపేర్ చేయించుకోవాలని సూచించారని తెలిపారు.

పోలీసుల ప్రాథమిక నిర్ధారణ

పోలీసుల ప్రాథమిక విచారణ ప్రకారం, ఇది రోడ్డు ప్రమాదంగా భావిస్తున్నారు. ప్రమాద సమయంలో బైక్ అదుపుతప్పి పల్లపు ప్రాంతంలోకి జారిపడినట్లు అనుమానిస్తున్నారు.

అయితే, ప్రవీణ్ కుమార్ కుటుంబ సభ్యులు, సన్నిహితులు, క్రైస్తవ సంఘాలు ఆయన మృతిపై అనుమానాలు వ్యక్తం చేశారు. అందువల్ల ఈ కేసును అనుమానాస్పద మృతిగా నమోదు చేసి దర్యాప్తు కొనసాగిస్తున్నామని తూర్పు గోదావరి జిల్లా ఎస్పీ నరసింహ కిశోర్ తెలిపారు.

సామాజిక మాధ్యమాల్లో అవాస్తవ ప్రచారంపై పోలీసులు హెచ్చరిక

సోషల్ మీడియాలో పాస్టర్ ప్రవీణ్ కుమార్‌కు సంబంధించిన వీడియోలు, ఫోటోలు వైరల్ అవుతున్నాయి. ముఖ్యంగా, మద్యం దుకాణంలో ఉన్న వీడియో ఎక్కడ నుంచి వచ్చింది అనే విషయం ఇంకా తెలియరాలేదు.

ప్రాథమిక పోస్ట్ మార్టం నివేదికలో ఆయన చేతులపై, తలపై గాయాలు ఉన్నట్లు తెలుస్తోంది. శరీరంపై కొన్ని కాలిన గాయాలు కూడా ఉన్నట్లు గుర్తించారు. పాథాలజీ రిపోర్టు కూడా తీసుకుంటున్నాం.పూర్తి నివేదిక వచ్చాక మరింత స్పష్టత వస్తుందని ఐజీ అశోక్ కుమార్ తెలిపారు.

అలాగే, ఈ ఘటనపై నిర్ధారణ లేకుండా సోషల్ మీడియాలో తప్పుడు ప్రచారం చేయడం, రెచ్చగొట్టే వ్యాఖ్యలు చేయడం చట్టరీత్యా నేరమని, అందరూ సంయమనం పాటించాలని పోలీసులు హెచ్చరించారు.