Breaking News

భారత్ ఎలక్ట్రానిక్స్ రంగాన్ని అడ్డుకునే చైనా కుట్రలు: పరిశ్రమల ఆందోళన

భారత్ ఎలక్ట్రానిక్స్ రంగాన్ని అడ్డుకునే చైనా కుట్రలు: పరిశ్రమల ఆందోళన


Published on: 22 Jul 2025 08:49  IST

భారతదేశం ఎలక్ట్రానిక్స్ రంగంలో వేగంగా అభివృద్ధి చెందుతున్న పరిస్థితిని చైనా జీర్ణించుకోలేక, ఆ రంగంపై వివిధ అడ్డంకులు సృష్టిస్తున్నట్లు పరిశ్రమ వర్గాలు వెల్లడించాయి. ముఖ్యంగా కీలక పరికరాలు, ముడిపదార్థాల సరఫరాపై చైనా అస్పష్టమైన నియంత్రణలు అమలు చేయడం, అక్కడ పనిచేస్తున్న వారి నిపుణులకు "భారత్‌ను విడిచి వెళ్లండి" అనే ఆదేశాలు ఇవ్వడం ఆందోళన కలిగిస్తోంది.

ఈ నేపథ్యంలో ఇండియా సెల్యులర్ అండ్ ఎలక్ట్రానిక్స్ అసోసియేషన్ (ICEA) కేంద్ర ప్రభుత్వానికి లేఖ రాసి, చైనా చర్యలపై తక్షణ జోక్యం అవసరమని కోరింది. చైనా అనధికార వాణిజ్య ఆంక్షలకు పాల్పడుతోందని, ఇది దేశపు అంతర్జాతీయ పోటీతత్వాన్ని దెబ్బతీసే ప్రమాదముందని పేర్కొంది. ఇది ముఖ్యంగా రూ.2.75 లక్షల కోట్ల విలువైన స్మార్ట్‌ఫోన్ల ఎగుమతి లక్ష్యాన్ని ప్రమాదంలోకి నెట్టే అవకాశముందని హెచ్చరించింది.

యాపిల్, గూగుల్, ఫాక్స్‌కాన్, మోటోరోలా, వివో వంటి దిగ్గజ కంపెనీలు సభ్యులుగా ఉన్న ICEA ప్రకారం, చైనా అధికారిక సమాచారం లేకుండానే కేవలం మౌఖిక ఆదేశాలతో సరఫరాలో ఆటంకాలు సృష్టిస్తోంది. ఇప్పటికే భారత్‌లోని ఫాక్స్‌కాన్ ప్లాంట్లలో పనిచేస్తున్న సుమారు 300 మంది చైనా ఇంజినీర్లను వెనక్కు రీకాల్ చేసినట్లు బ్లూమ్‌బర్గ్ నివేదించింది. ఇది త్వరలో భారత్‌లో ఐఫోన్ 17 తయారీ ప్రారంభించాలన్న యాపిల్ ప్రణాళికలకు ఆటంకంగా మారే అవకాశముంది.

ఈ పరిస్థితిపై స్పందించిన కేంద్ర ప్రభుత్వం, ఇది కంపెనీల పరమైన వ్యవహారంగా పేర్కొంటూ, యాపిల్‌కు ప్రత్యామ్నాయ ఏర్పాట్లు ఉన్నాయని విశ్వాసం వ్యక్తం చేసింది. ఈ నేపథ్యంలో భారతదేశం ఇతర దేశాలపై ఆధారపడకుండా, స్వదేశీ పరిష్కారాలపై దృష్టి పెట్టాల్సిన అవసరం మరింత స్పష్టమవుతోంది.

Follow us on , &

ఇవీ చదవండి

ట్రెండింగ్ వార్తలు మరిన్ని

Advertisement