భారత ద్విచక్ర వాహన మార్కెట్‌లో సంవత్సరాలుగా అగ్రస్థానంలో కొనసాగుతున్న స్కూటర్‌గా హోండా యాక్టివాకు ప్రత్యేక గుర్తింపు ఉంది. ఇది కేవలం రోజువారీ ప్రయాణానికి ఉపయోగపడే వాహనమే కాదు… అనేక కుటుంబాలకు నమ్మకమైన సహచరంగా మారింది. బలమైన నిర్మాణం, నాణ్యమైన ఇంజిన్‌, స్మూత్ రైడింగ్ అనుభవంతో యాక్టివా భారత రోడ్లపై తనదైన స్థానాన్ని సంపాదించుకుంది.

ఇంధన ధరలు ఎప్పటికప్పుడు పెరుగుతున్న ఈ రోజుల్లో స్కూటర్ కొనుగోలు చేసే సమయంలో మైలేజీ కీలక అంశంగా మారింది. ఈ విషయంలో హోండా యాక్టివా వినియోగదారుల అంచనాలను తీరుస్తోంది. కంపెనీ సమాచారం ప్రకారం యాక్టివా ఒక్క లీటర్ పెట్రోలుకు దాదాపు 59 కిలోమీటర్ల వరకూ మైలేజీ ఇవ్వగలదని చెబుతున్నారు. వాస్తవ వినియోగంలో, రోడ్ పరిస్థితులు మరియు మెయింటెనెన్స్‌ను బట్టి సగటుగా 40 నుంచి 47 కిలోమీటర్ల వరకు మైలేజీ వస్తుందని యాక్టివా యూజర్లు పేర్కొంటున్నారు.

ఫుల్ ట్యాంక్‌తో దీర్ఘ ప్రయాణం..
యాక్టివా 110సీసీ మోడల్‌లో 5.3 లీటర్ల ఇంధన ట్యాంక్ ఉంటుంది. సగటున లీటరుకు 45 కిలోమీటర్ల మైలేజ్ వస్తుందని లెక్కిస్తే, ఒకసారి ట్యాంక్ నింపితే 230 కిలోమీటర్లకు పైగా ప్రయాణించే అవకాశం ఉంది. అంటే హైదరాబాద్ నుంచి విజయవాడ వరకు దాదాపుగా ఒకే సారి ప్రయాణించవచ్చన్న మాట. ప్రస్తుత పెట్రోల్ ధరలను పరిగణనలోకి తీసుకుంటే, ట్యాంక్ ఫుల్ చేయడానికి పెద్దగా భారమయ్యే ఖర్చు ఉండదు. తక్కువ ఖర్చుతో ఎక్కువ దూరం వెళ్లాలనుకునే వారికి యాక్టివా మంచి ఎంపికగా నిలుస్తోంది.

ఫీచర్లు, ఇంజిన్ సామర్థ్యం..
హోండా యాక్టివా 6జీ మోడల్‌లో ఆధునిక సాంకేతికతను పొందుపరిచారు. కంబైన్డ్ బ్రేకింగ్ సిస్టమ్ (CBS) భద్రతను మెరుగుపరచగా, టెలిస్కోపిక్ ఫ్రంట్ సస్పెన్షన్ సౌకర్యవంతమైన రైడ్‌ను అందిస్తుంది. ట్యూబ్‌లెస్ టైర్లు ప్రయాణంలో అదనపు భద్రతను ఇస్తాయి. యాక్టివా 110సీసీ, 125సీసీ అనే రెండు ఇంజిన్ వేరియంట్‌లలో అందుబాటులో ఉంది. 110సీసీ మోడల్‌లో ఎయిర్-కూల్డ్, సింగిల్ సిలిండర్, BS6 ప్రమాణాలకు తగ్గ ఇంజిన్ అమర్చారు. ఇది సుమారు 8 పీఎస్ శక్తిని, 9 ఎన్‌ఎం టార్క్‌ను ఉత్పత్తి చేస్తుంది.

ధర & మార్కెట్ పోటీ..
హోండా యాక్టివా 110సీసీ స్కూటర్ ధర ఎక్స్-షోరూమ్‌లో సుమారు రూ.75 వేల నుంచి ప్రారంభమవుతుంది. వేరియంట్‌ను బట్టి ధర రూ.88 వేల వరకు ఉంటుంది. నగరాన్ని బట్టి ఆన్‌రోడ్ ధరల్లో మార్పులు ఉండొచ్చు. ఈ ధర శ్రేణిలో యాక్టివాకు TVS జూపిటర్, సుజుకి యాక్సెస్ వంటి స్కూటర్లు పోటీగా ఉన్నాయి. అయినప్పటికీ బ్రాండ్ విశ్వసనీయత, మంచి మైలేజీ, తక్కువ మెయింటెనెన్స్ ఖర్చుల కారణంగా యాక్టివా ఇప్పటికీ వినియోగదారుల తొలి ఎంపికగా కొనసాగుతోంది.