హైదరాబాద్ మెట్రో రైలుకు రోజుకు రూ.కోటిన్నర నష్టం వస్తున్నట్లు అధికారులు చెబుతున్నారు.

హైదరాబాద్ మెట్రో రైలుకు రోజుకు రూ.కోటిన్నర నష్టం వస్తున్నట్లు అధికారులు చెబుతున్నారు. దీంతో టికెట్ ధరలు పెంచాలని మెట్రో రైలు సంస్థ ప్రభుత్వానికి విజ్ఞప్తి చేసింది.

Published on: 28 Mar 2025 12:18 IST

మెట్రో నష్టాలు – టికెట్ ధరల పెంపు

మెట్రో అధికారుల వివరాల ప్రకారం, రోజుకు సుమారు 5.10 లక్షల మంది ప్రయాణికులు మెట్రో రైళ్లలో ప్రయాణిస్తున్నారు. కరోనా ముందు రోజుకు రూ. 80 లక్షల పైచిలుకు ఆదాయం వస్తుండగా, లాక్‌డౌన్‌ ప్రభావంతో మెట్రో ఆర్థికంగా తీవ్రంగా నష్టపోయింది. లాక్‌డౌన్‌ ఎత్తివేసిన తర్వాత ప్రయాణికుల సంఖ్య పెరిగినా, నిర్వహణ ఖర్చులు అధికమవ్వడం వల్ల నష్టాలు ఇంకా కొనసాగుతున్నాయి.

ఉచిత బస్సు ప్రయాణం ప్రభావం

మహిళలకు ఆర్టీసీ బస్సుల్లో ఉచిత ప్రయాణం అమలు చేయడంతో, మెట్రోలో ప్రయాణించే మహిళల సంఖ్య గణనీయంగా తగ్గిందని అధికారులు వెల్లడించారు. ఈ ప్రభావం కూడా మెట్రో ఆర్థిక పరిస్థితిపై తీవ్ర ప్రభావం చూపిందని చెబుతున్నారు.

టికెట్ ధరల పెంపు పై ప్రభుత్వం స్పందన

నష్టాలను తగ్గించేందుకు టికెట్ ధరలు పెంచాలని మెట్రో రైలు సంస్థ ప్రభుత్వానికి విజ్ఞప్తి చేసింది. కానీ, ప్రయాణికులపై భారం వేయడానికి రాష్ట్ర ప్రభుత్వం సిద్ధంగా లేనట్లు తెలిసింది. నష్టాలు వస్తున్నా, ధరలు పెంచే ఆలోచన లేదని ప్రభుత్వం ఇప్పటికే స్పష్టం చేసినట్లు సమాచారం. ప్రస్తుతం కనీస టికెట్ రూ. 10, గరిష్ఠ టికెట్ రూ. 60 ఉండగా, ఒకవేళ ధరలు పెంచితే కనీసం రూ. 20 నుంచి గరిష్ఠ టికెట్ రూ. 80 వరకు పెంచే అవకాశం ఉందని భావిస్తున్నారు. అయితే, దీని వల్ల సామాన్య ప్రయాణికులపై అదనపు భారం పడుతుందనే ఆందోళన కూడా వ్యక్తమవుతోంది.