ఈ అద్భుతమైన విషయం ముంబైలోని యూఎస్ కాన్సులేట్ దగ్గర చోటుచేసుకుంది. అక్కడ ఒక ఆటోడ్రైవర్ ఏవైనా మొబైల్ యాప్స్, ఆన్‌లైన్ సిస్టమ్స్, బుకింగ్స్ లేకుండా, తాను నేరుగా ఏ ప్రయాణికుడినీ తీసుకెళ్ళకుండా ఆదాయం సంపాదిస్తున్నాడు.

అతడి వ్యాపారం చాలా సరళమైనది – ఎంబసీకి వచ్చేవారు తమ బ్యాగులను లోపలికి తీసుకెళ్లలేకపోవడంతో, తాత్కాలికంగా భద్రంగా ఉంచే స్థలం అవసరమవుతుంది. ఈ ఆటోడ్రైవర్ తన ఆటోను చిన్న క్లాక్‌రూమ్‌లా మార్చేశాడు. అతడి వద్ద బ్యాగ్ ఉంచినవారు తన పని ముగించుకుని తిరిగి వస్తారు. అదే వ్యాపారం అతనికి లక్షల ఆదాయాన్ని తెచ్చిపెట్టింది.

ఇక ఈ విషయాన్ని వెలుగులోకి తీసుకువచ్చిన వ్యక్తి – ప్రముఖ కంపెనీ లెన్స్‌కార్ట్ కు చెందిన రాహుల్ రూపాణి. ఒకరోజు యూఎస్ ఎంబసీకి వీసా అపాయింట్‌మెంట్‌ కోసం వచ్చిన రాహుల్ బ్యాగ్‌ను లోపలికి తీసుకెళ్లలేని పరిస్థితిలో తారసపడ్డాడు. అదే సమయంలో ఆ ఆటోడ్రైవర్ వచ్చి, “బ్యాగ్‌ను నా ఆటోలో పెట్టండి, భద్రంగా ఉంటుంది” అని చెప్పాడు. బ్యాగ్‌కు రూ.1000 చార్జ్ అని చెప్పిన వెంటనే రాహుల్‌కు షాక్.

ఆటోడ్రైవర్ రోజూ ఇలా 20 నుండి 30 బ్యాగులు ఉంచడం వల్ల, అతడి ఆదాయం రోజుకు రూ.20,000-30,000 మధ్యలో ఉంటుందని చెప్పారు. అంటే నెలకు కనీసం రూ.5 లక్షల నుంచి రూ.8 లక్షల వరకూ సంపాదిస్తున్నాడన్న మాట!

తన ఆటోలో పరిమిత స్థలమే ఉండటంతో, ఆ ఆటోడ్రైవర్ స్థానిక పోలీసులతో కలిసి వాళ్ల స్థలాన్ని కూడా ఉపయోగిస్తున్నాడు. ఎంబసీకి వచ్చిన ప్రయాణికులను నేరుగా పోలీసుల దగ్గరికి తీసుకెళ్లి, అక్కడ తన క్లాక్‌రూమ్ సేవలను అందిస్తున్నాడు. దీంతో ప్రయాణికులకు నమ్మకం, భద్రత రెండూ కలుగుతున్నాయి.

ఈ ఆటో డ్రైవర్ కథ ఒక్క వ్యాపార విజయం మాత్రమే కాదు – ఇది సృజనాత్మక ఆలోచన, సమయాన్ని సద్వినియోగం చేసుకోవడం, సమస్యను అవకాశంగా మలచడం అనే గొప్ప సందేశాన్ని ఇస్తుంది. మన దగ్గర ఉన్న సాధనాలు, పరిసరాల్లో ఉన్న అవసరాలను గమనిస్తూ నమ్మకంతో ముందుకెళ్తే, డిగ్రీలకంటే ముందు ఆలోచన ఉంటే ఎంతైనా సాధ్యమే అనే గొప్ప ఉదాహరణగా నిలిచాడు ఈ ఆటో అన్న.

ఈ కథ యువతకు, చిన్న వ్యాపారులు, ఉద్యోగాల కోసం ఎదురుచూస్తున్నవారికి గొప్ప స్ఫూర్తి. మన చుట్టూ ఉన్న సాధారణ సమస్యలకు అనుకోని మార్గాల్లో పరిష్కారాలు చూపగలిగితే, మనకే కాదు సమాజానికీ ఉపయోగకరమయ్యే మార్గాలు తెరుచుకుంటాయి. డిగ్రీలు లేకుండానే లక్షల్లో సంపాదించాలన్నా, అవసరమయ్యేది ఓ తీవ్రమైన ఆలోచన, నిజాయితీ, ధైర్యం మాత్రమే అని ఈ ఆటో డ్రైవర్ జీవంగా చూపించాడు!