త్వరలో జరగనున్న అసెంబ్లీ ఎన్నికల దృష్ట్యా స్పెషల్ ఇంటెన్సివ్ రివిజన్ (సర్) అనే ప్రత్యేక కార్యక్రమం దేశవ్యాప్తంగా హాట్ టాపిక్‌గా మారింది. బిహార్‌లో లక్షలాది ఓటర్ల పేర్లు తొలగించబడ్డాయని ప్రతిపక్షాలు ఆరోపించడంతో పాటు మీడియా రిపోర్టులు బయటకు రావడంతో వివాదం మరింత పెరిగింది. కాంగ్రెస్ సహా పలు పార్టీలు దీనిపై ఆందోళన వ్యక్తం చేయగా, కొందరు నేరుగా కోర్టు కూడా ఆశ్రయించారు. పారదర్శక ఓటరు జాబితా కోసం ఈ ప్రత్యేక రివిజన్‌ను దేశవ్యాప్తంగా అమలు చేస్తామని ఎన్నికల సంఘం ఇప్పటికే ప్రకటించింది.

ఈ పరిణామాల నడుమ, ఉమ్మడి నల్గొండ జిల్లాలోని 12 అసెంబ్లీ నియోజకవర్గాల్లో అధికారులు ఓటర్ల జాబితాలను సవివరంగా పరిశీలిస్తున్నారు. దీంతో, ఓటర్ల మార్పులు, కొత్త పేర్లు చేర్చడం, పాతవాటి తొలగింపులు ప్రధాన చర్చాంశాలుగా మారాయి.

2002లో పెద్ద ఎత్తున మార్పులు

2002లోనే ఓటర్ల జాబితాల్లో పెద్ద ఎత్తున మార్పులు జరిగాయి. కొన్ని గ్రామాలు పట్టణాలుగా మారగా, ఉపాధి, ఉద్యోగాల కోసం చాలామంది వలస వెళ్ళిపోయారు. ఓటు వేసే స్థలం ఒకచోట ఉండి, వారు నివాసం మరొకచోట కొనసాగించడం వల్ల సమస్యలు తలెత్తాయి. కొందరికి రెండు చోట్ల ఓటుహక్కు నమోదు కావడం కూడా జరిగింది.

ఎన్నికల కమిషన్ పంపిన పాత లిస్ట్

ప్రస్తుతం జరుగుతున్న సర్‌ ప్రక్రియ కోసం ఎన్నికల కమిషన్ 2002 ఓటర్ లిస్ట్‌ను జిల్లాలకు పంపింది. దాన్ని 2025 జనవరిలో విడుదలైన ఫైనల్ ఓటర్ లిస్ట్‌తో పోల్చుతున్నారు. మండలాల వారీగా పేర్లు ఉన్నాయా? లేక పోయాయా? అనే అంశాన్ని అధికారులు చెక్ చేస్తున్నారు. అదనంగా, కొత్తగా నమోదైన ఓటర్ల జాబితాను వేరుగా సిద్ధం చేస్తున్నారు.

మారిన ఓటర్ల సంఖ్య

గత 23 ఏళ్లలో ఓటర్ల సంఖ్య గణనీయంగా పెరిగింది. చనిపోయిన వారి పేర్ల తొలగింపు, ఇతర మార్పుల అనంతరం, 2025 జనవరి నాటికి నల్గొండ జిల్లాలో మొత్తం 29,76,518 మంది ఓటర్లు నమోదయ్యారు. వీరిలో 14,63,142 మంది పురుషులు, 15,11,939 మంది మహిళలు, 1,183 మంది సర్వీస్ ఓటర్లు, అలాగే 205 మంది థర్డ్‌జెండర్లు ఉన్నారు. ఇది 2002తో పోలిస్తే సుమారు 5.46 లక్షల ఓటర్లు పెరిగినట్లు లెక్కలు చెబుతున్నాయి. అయితే, అప్పట్లో ఓటర్లుగా ఉన్న చాలామంది పేర్లు ఇప్పుడు జాబితాలో లేకపోవడం గమనార్హం. కొత్తగా ఓటర్లుగా నమోదైన వారు తమ స్థానికత నిరూపించుకునే డాక్యుమెంట్లు చూపించాల్సిన అవసరం ఉంది.

నియోజకవర్గాల మార్పులు

ఉమ్మడి జిల్లాలో 12 అసెంబ్లీ నియోజకవర్గాలు ఉన్నప్పటికీ, పునర్విభజన తర్వాత సరిహద్దులు మారాయి. రామన్నపేట, చలకుర్తి నియోజకవర్గాలు రద్దు కాగా, వాటి స్థానంలో నాగార్జునసాగర్, హుజూర్నగర్ నియోజకవర్గాలు ఏర్పాటయ్యాయి. అలాగే, మిర్యాలగూడ లోక్‌సభ నియోజకవర్గం స్థానంలో భువనగిరి పార్లమెంట్ నియోజకవర్గం వచ్చింది. 2002 సర్‌ లిస్ట్ ప్రకారం, ఉమ్మడి జిల్లాలో 24,30,469 మంది ఓటర్లు ఉన్నారు. అప్పట్లో పురుషులు 12,15,880, మహిళలు 12,14,551, థర్డ్‌జెండర్లు 38 మంది ఉన్నారు.

ప్రస్తుతం అధికారులు ఈ పాత రికార్డులను కొత్త జాబితాలతో పోల్చుతూ విస్తృతంగా పరిశీలిస్తున్నారు. దీని ఫలితంగా భవిష్యత్ ఎన్నికల్లో మరింత పారదర్శకతతో కూడిన ఓటరు జాబితా అందుబాటులోకి వస్తుందని భావిస్తున్నారు.