అమెరికా అధ్యక్షుడు డొనాల్డ్ ట్రంప్ మళ్లీ సంచలన నిర్ణయం తీసుకున్నారు. వచ్చే అక్టోబర్ 1, 2025 నుంచి బ్రాండెడ్, పేటెంట్ ఉన్న ఔషధ ఉత్పత్తులపై 100% టారిఫ్ (సుంకం) విధించనున్నట్టు ఆయన ప్రకటించారు. ఈ నిర్ణయం ప్రపంచవ్యాప్తంగా ఔషధ రంగంపై ప్రభావం చూపనుంది. ముఖ్యంగా భారతదేశానికి ఇది పెద్ద ఎదురుదెబ్బగా మారబోతోంది.

అమెరికా, భారత ఔషధాలకు ప్రధాన మార్కెట్. టారిఫ్‌లు పెరగడం వల్ల భారత కంపెనీలు అక్కడి మార్కెట్లో పోటీ చేయడం కష్టమవుతుంది. దీని ప్రభావంగా ఎగుమతులు తగ్గిపోవడంతో భారీ నష్టాలు వస్తాయని నిపుణులు హెచ్చరిస్తున్నారు. మరోవైపు అమెరికా వినియోగదారులు కూడా మందులు కొనుగోలు చేయడానికి ఎక్కువ ఖర్చు పెట్టాల్సి రావచ్చు.

ట్రంప్ తీసుకున్న ఈ నిర్ణయానికి అసలు కారణం స్పష్టంగా తెలియకపోయినా, వాణిజ్య ఉద్రిక్తతలు మళ్లీ పెరగబోతున్నాయనే అభిప్రాయం నిపుణులది. ఆయన చెప్పిన ప్రకారం, అమెరికాలోనే ఔషధ ఉత్పత్తి చేసే కంపెనీలకు మాత్రం ఈ టారిఫ్ వర్తించదు. అంటే, అమెరికాలో ఫ్యాక్టరీలు పెట్టుకున్న సంస్థలకు మినహాయింపు ఉంటుంది.

కేవలం ఔషధాలపైనే కాకుండా, ట్రంప్ ఇతర ఉత్పత్తులపై కూడా కొత్త టారిఫ్‌లు ప్రకటించారు. కిచెన్ క్యాబినెట్లు, బాత్రూమ్ వానిటీలపై 50%, సోఫా-ఫర్నిచర్‌పై 30%, భారీ ట్రక్కులపై 25% సుంకాలు విధించనున్నారు. ఇవన్నీ కూడా అక్టోబర్ 1 నుంచి అమల్లోకి వస్తాయి. అమెరికాలోనే ఉత్పత్తి జరిగి, అక్కడి ఉద్యోగావకాశాలు పెరగాలనే ఉద్దేశ్యంతోనే ఈ చర్యలు తీసుకున్నారని విశ్లేషకులు చెబుతున్నారు.

భారత్‌పై ప్రభావం

భారత ఔషధ రంగం అమెరికాపై బాగా ఆధారపడుతోంది. FY24లో భారత ఔషధ ఎగుమతులు 27.9 బిలియన్ డాలర్లు కాగా, అందులో 31% అంటే 8.7 బిలియన్ డాలర్ల విలువైన మందులు అమెరికాకు వెళ్లాయి. FY25లో ఈ ఎగుమతులు 30.47 బిలియన్ డాలర్లకు పెరుగుతాయని అంచనా.

అమెరికాలో వినియోగించే జెనరిక్ మందులలో 45% పైగా, బయోసిమిలర్ ఔషధాలలో 15% భారతదేశం నుంచే సరఫరా అవుతున్నాయి. ఇలాంటి పరిస్థితుల్లో 100% టారిఫ్ భారత కంపెనీలకు భారీ దెబ్బ. ఎగుమతులు తగ్గి, ఆదాయాలు పడిపోవడంతో రంగంపై తీవ్ర ప్రభావం చూపనుంది.