అమెరికా (USA) నాన్-ఇమిగ్రెంట్‌ వీసాల (NIV) కోసం దరఖాస్తు చేస్తున్న భారతీయులకు ఓ కొత్త నిర్ణయం ప్రభావం చూపనుంది. అమెరికా ప్రభుత్వం తాజా మార్పులు ప్రకటిస్తూ, నాన్‌-ఇమిగ్రెంట్‌ వీసా ఇంటర్వ్యూలు తమ స్వదేశం లేదా లీగల్‌ రెసిడెన్సీ ఉన్న ప్రదేశంలోనే చేయించాలని స్పష్టం చేసింది. ప్రస్తుతం ఇంటర్వ్యూలు నిర్వహించని కొన్ని దేశాల్లో మాత్రమే మినహాయింపు వర్తిస్తుందని పేర్కొంది.

ఈ కారణంగా, భారతీయ వ్యాపారులు, పర్యాటకులు తదితరులకి B1 (వ్యాపార) మరియు B2 (పర్యటన) వీసాలు పొందడం కష్టం అవుతుంది. గతంలో విదేశాల్లోని అమెరికా దౌత్య కార్యాలయాల్లోనే వీరు వీసా ఇంటర్వ్యూలు షెడ్యూల్ చేసుకునేవారు, కానీ ఇప్పుడు ఆ అవకాశానికి గడువు ముగిసింది.

కొవిడ్‌-19 సమయంలో వీసాల జారీ పెద్దగా ఆలస్యం కావడం గమనార్హం. తాజాగా అమలవుతున్న నిబంధనలతో తిరిగి ఇలాంటి పరిస్థితులు ఏర్పడే అవకాశముంది.

నాన్‌-ఇమిగ్రెంట్‌ వీసాలు వ్యాపార ప్రయోజనాలు, పర్యటన, విద్య, తాత్కాలిక ఉద్యోగాలు, అమెరికన్ పౌరులను వివాహం చేసుకోవడం వంటి ప్రయోజనాల కోసం అందజేయబడతాయి. అమెరికా విదేశాంగశాఖ ప్రకటన ప్రకారం, ఈ నిబంధనలు తక్షణమే అమల్లోకి వస్తాయని ప్రకటించింది.

ప్రస్తుతం భారత్‌లోని వీసా ఇంటర్వ్యూలు సమయ పట్టిక:

• హైదరాబాద్, ముంబయిలో సుమారు 3.5 నెలల సమయం పడుతోంది

• ఢిల్లీ: 4 నెలలు

• కోల్‌కత్తా: 5 నెలలు

• చెన్నై: 9 నెలలు

ఈ పరిస్థితి కారణంగా, చాలామంది భారతీయులు జర్మనీ, సింగపూర్‌, బ్యాంకాక్‌లాంటి ఇతర దేశాలకు వెళ్లి అమెరికా వీసా అపాయింట్‌మెంట్‌ బుక్ చేసుకుంటున్నారు. 2 సంవత్సరాల క్రితం, ఫ్రాంక్‌ఫర్ట్‌లో భారతీయుల కోసం ప్రత్యేక ఇంటర్వ్యూలను నిర్వహించే ఏర్పాట్లు కూడా జరిగాయి. H-1B వీసా కోసం బ్రెజిల్‌, థాయ్‌ల్యాండ్ వెళ్లి ఇంటర్వ్యూలు చేసినవారూ ఉన్నారు.

ఇటీవల కాలంలో, అమెరికాకు వెళ్ళే భారతీయ విద్యార్థుల సంఖ్య గణనీయంగా తగ్గిపోవడం గణాంకాలు చెబుతున్నాయి. వీసా సమస్యల కారణంగా యువత ఇతర దేశాల వైపు దృష్టిపెట్టి ఉండటం స్పష్టమైంది.