పార్లమెంట్ శీతాకాల సమావేశాలు ఈసారి తీవ్ర రాజకీయ వేడెక్కే అవకాశం కనిపిస్తోంది. బిహార్‌లో జరిగిన ఎన్నికల్లో విజయం తర్వాత అధికార పక్షం మరింత దూకుడుగా ముందుకెళ్లేందుకు సిద్ధమవుతుండగా, మరోవైపు ప్రతిపక్షాలు పలు కీలక అంశాలతో ప్రభుత్వాన్ని ప్రశ్నించేందుకు వ్యూహాలు రచిస్తున్నాయి. ఈ సమావేశాలు సోమవారం ఉదయం 11 గంటలకు ప్రారంభమై ఈ నెల 19వ తేదీ వరకు కొనసాగనున్నాయి.

సెలవు దినాలు మినహాయిస్తే, మొత్తం 15 రోజులపాటు సభ కార్యకలాపాలు జరగనున్నాయి. ఈ సమావేశాల్లో కేంద్ర ప్రభుత్వం కీలకమైన శాసన కార్యక్రమాలను ముందుకు తీసుకురావాలని భావిస్తోంది. 10 కొత్త బిల్లులు, నాలుగు ఆర్థిక సవరణ బిల్లులతో పాటు అవసరం లేని 120 పాత చట్టాలను రద్దు చేసే మరో ముఖ్యమైన బిల్లును కూడా సభ ముందు ఉంచేందుకు సిద్ధమైంది.

అణుశక్తి నుంచి విద్య వరకూ కీలక బిల్లులు

ఈ శీతాకాల సమావేశాల్లో అణుశక్తి, ఉన్నత విద్య, బీమా, కార్పొరేట్ రంగం, సెక్యూరిటీస్ మార్కెట్ నియంత్రణ, జాతీయ రహదారులు, మధ్యవర్తిత్వం–రాజీ చట్టాల సవరణ వంటి అంశాలపై కీలక బిల్లులు చర్చకు రానున్నాయి. వీటిలో ముఖ్యంగా అణుశక్తి రంగంలో ప్రైవేట్ సంస్థల భాగస్వామ్యానికి మార్గం సుగమం చేసే అణుశక్తి బిల్లు–2025 ప్రాధాన్యత సంతరించుకుంది.

అలాగే విశ్వవిద్యాలయాలు, ఉన్నత విద్యాసంస్థలకు మరింత స్వయం ప్రతిపత్తి కల్పించే లక్ష్యంతో ఉన్నత విద్యా కమిషన్ ఏర్పాటు కోసం రూపొందించిన ఉన్నత విద్యా కమిషన్ బిల్లు–2025 కూడా కీలకంగా మారనుంది. ఈ బిల్లులపై సభలో తీవ్ర చర్చ జరిగే అవకాశముంది.

ప్రతిపక్షాల ప్రధాన అజెండా

ఈ సమావేశాల్లో ప్రభుత్వాన్ని ఇరుకున పెట్టేందుకు ప్రతిపక్షాలు ఇప్పటికే అజెండాను సిద్ధం చేసుకున్నాయి. ఓటర్ల జాబితాల ప్రత్యేక సవరణ ప్రక్రియ (స్పెషల్ రివిజన్), ఢిల్లీలో జరిగిన పేలుళ్లు, రాజధాని సహా ఉత్తర భారతాన్ని వేధిస్తున్న వాయు కాలుష్యం, అదానీ గ్రూప్‌లో ఎల్‌ఐసీ చేసిన పెట్టుబడుల అంశం వంటి విషయాలపై కేంద్రాన్ని నిలదీయాలని ప్రతిపక్ష కూటమి భావిస్తోంది. ఈ అంశాలన్నీ సభలో దుమారం రేపే అవకాశమున్నవిగా రాజకీయ వర్గాలు అంచనా వేస్తున్నాయి.

సభలు సజావుగా సాగేందుకు సహకరించాలని కేంద్రం విజ్ఞప్తి

పార్లమెంట్ సమావేశాలు నిర్మాణాత్మకంగా సాగాలని కేంద్ర ప్రభుత్వం కోరుతోంది. ఈ క్రమంలో ఆదివారం న్యూఢిల్లీలో రక్షణ మంత్రి రాజ్‌నాథ్ సింగ్ అధ్యక్షతన అఖిలపక్ష సమావేశం జరిగింది. ఈ భేటీలో పార్లమెంటరీ వ్యవహారాల శాఖ మంత్రి కిరణ్ రిజిజు, కేంద్ర మంత్రులు జేపీ నడ్డా, అర్జున్ రామ్ మేఘవాల్, ఎల్ మురుగన్, అనుప్రియ పటేల్‌తో పాటు కాంగ్రెస్, టీడీపీ, వైసీపీ, బీఆర్‌ఎస్, జనసేన సహా 36 పార్టీలకు చెందిన సుమారు 50 మంది నేతలు పాల్గొన్నారు.

సమావేశం అనంతరం కిరణ్ రిజిజు మాట్లాడుతూ, సభ కార్యకలాపాలకు ఆటంకాలు కలిగించకుండా ప్రతిపక్షాలు సహకరించాలని కేంద్రం కోరిందన్నారు. ప్రజా ప్రయోజనాలను దృష్టిలో పెట్టుకుని బిల్లులపై చర్చ జరిగేలా సహకారం అందించాలని విజ్ఞప్తి చేశారు.

ప్రభుత్వ స్పందన లేదని ప్రతిపక్ష విమర్శ

అఖిలపక్ష సమావేశంపై ప్రతిపక్షాలు అసంతృప్తి వ్యక్తం చేశాయి. రెండు గంటలకు పైగా ప్రతిపక్ష నేతల అభిప్రాయాలను విన్న ప్రభుత్వం, వాటిపై స్పష్టమైన స్పందన ఇవ్వలేదని కాంగ్రెస్ పార్టీ లోక్‌సభ ఉపనేత గౌరవ్ గోగోయ్ విమర్శించారు. ఇది కేవలం ఫార్మాలిటీగానే జరిగిందని ఆయన వ్యాఖ్యానించారు.

ఇక బీఆర్‌ఎస్ రాజ్యసభ సభ్యుడు కే.ఆర్. సురేష్ రెడ్డి మాట్లాడుతూ, అంధ్రప్రదేశ్–తెలంగాణ మధ్య నదీ జలాల వివాదాన్ని పరిష్కరించాల్సిన అవసరాన్ని ఈ సమావేశంలో లేవనెత్తినట్లు తెలిపారు. టీడీపీ నేత లావు శ్రీకృష్ణ దేవరాయులు కూడా కృష్ణా నదీ జలాల వినియోగం, కేటాయింపులపై పార్లమెంట్‌లో విస్తృత చర్చ జరగాలని డిమాండ్ చేశారు.

నేడు ఇండియా కూటమి కీలక భేటీ

పార్లమెంట్ సమావేశాల ముందు ప్రతిపక్షాలు వ్యూహాన్ని మరింత స్పష్టంగా చేసుకుంటున్నాయి. ఆదివారం సాయంత్రం కాంగ్రెస్ సీనియర్ నేతలు సోనియా గాంధీ నివాసంలో సమావేశమై, ప్రభుత్వాన్ని ఏ అంశాలపై నిలదీయాలనే విషయంపై చర్చించారు. ఈ సమావేశంలో ప్రతిపక్ష వ్యూహానికి తుది రూపు దిద్దినట్లు సమాచారం.

ఇక సోమవారం ఉదయం రాజ్యసభలో ప్రతిపక్ష నేత అయిన మల్లికార్జున ఖర్గే చాంబర్‌లో ఇండియా కూటమి పార్టీల ప్రతినిధులు సమావేశం కాబోతున్నారు. ఈ భేటీలో పార్లమెంట్‌లో లేవనెత్తాల్సిన అంశాలు, సభలో అనుసరించాల్సిన వ్యూహంపై సమన్వయం చేసుకోనున్నారు.