ఇరాన్‌-ఇజ్రాయెల్‌ మధ్య మిలటరీ స్థాయిలో జరిగిన ఎదురుదాడులతో పశ్చిమాసియా ప్రాంతం కుదుపులకు గురవుతోంది. ఇజ్రాయెల్‌ ఇటీవల ఇరాన్‌పై భారీ వైమానిక దాడులు జరపగా, ఈ దాడుల్లో ముఖ్యమైన అణుశక్తి కేంద్రాలు, ఆయుధ నిల్వలు లక్ష్యంగా మారాయి. దీనికి ప్రతిగా ఇరాన్‌ కూడా బాలిస్టిక్‌ క్షిపణులు ప్రయోగిస్తూ, ఇజ్రాయెల్‌పై ప్రతీకారం తీర్చుకునే ప్రయత్నం చేస్తోంది. ఈ పరస్పర దాడుల వల్ల రెండు దేశాల్లో మానవ, ఆస్తి నష్టాలు భారీగా సంభవిస్తున్నాయి.

అణుశక్తి స్థావరాలే లక్ష్యం

ఇజ్రాయెల్‌ సైన్యం మొదటి దశలో ఇరాన్‌లోని కీలక అణు కేంద్రాలు, సైనిక స్థావరాలపై దాడులు జరిపింది. బుషెహర్‌లోని ప్రముఖ న్యాచురల్‌ గ్యాస్‌ క్షేత్రం, చమురు శుద్ధి కేంద్రం, టెహ్రాన్‌ సమీపంలోని ఆయుధ ఉత్పత్తి కేంద్రాలు ఈ దాడుల్లో ప్రభావితమయ్యాయి. షిరాజ్‌లోని ఎలక్ట్రానిక్‌ ఉత్పత్తుల పార్క్‌పై కూడా భారీగా క్షిపణులు విసిరారు.

ఈ దాడుల్లో ఇరాన్‌ గూఢచార విభాగానికి చెందిన కీలక వ్యక్తులు మృతి చెందినట్టు చెబుతోంది. మషాద్‌లో ఉన్న వైమానిక స్థావరంలో నిలిపి ఉంచిన ఓ రీఫ్యూయలింగ్‌ విమానం కూడా క్షిపణి దాడిలో ధ్వంసమైంది. టెహ్రాన్‌లోని రక్షణ శాఖ కార్యాలయం సైతం తీవ్రంగా దెబ్బతింది.

కారు బాంబులతో అణు శాస్త్రవేత్తల పై దాడి

ఇజ్రాయెల్‌ గూఢచార సంస్థ మొస్సాద్‌ లెబనాన్‌లో హిజ్బుల్లా నాయకులపై జరిపిన ‘వాకీటాకీ బాంబు’ దాడులు చర్చనీయాంశంగా మారాయి. తాజాగా ఇరాన్‌లో కూడా ఇలాంటి పద్ధతిని అనుసరించినట్టు తెలుస్తోంది. కారులో అమర్చిన బాంబులతో ఏకకాలంలో పలు చోట్ల పేలుళ్లు జరిగి, ఆరుగురు అణు శాస్త్రవేత్తలు మృతి చెందినట్టు సమాచారం. ఈ దాడులతో మొత్తం 14 మంది శాస్త్రవేత్తలు ప్రాణాలు కోల్పోయినట్టు రిపోర్ట్స్‌ వెల్లడించాయి.

ఇజ్రాయెల్‌పై హజ్ ఖాసీం క్షిపణి దాడి

ఇరాన్‌ తొలిసారిగా 'హజ్‌ ఖాసీం' అనే అధిక శక్తిమంతమైన బాలిస్టిక్‌ క్షిపణిని ప్రయోగించింది. ఈ క్షిపణి దాడితో టెల్‌అవీవ్‌ శివార్లలో పలు పట్టణాలు తుడిచిపెట్టుకుపోయాయి. ఇందులో నలుగురు చిన్నారులు సహా 10 మంది మృతిచెందినట్టు సమాచారం. టెల్‌అవీవ్‌లోని వైజ్‌మాన్‌ ఇన్‌స్టిట్యూట్‌పై డ్రోన్‌ దాడి జరిపినప్పటికీ, శాస్త్రవేత్తలు అప్పటికే బంకర్లకు వెళ్లిపోయినందున ప్రాణనష్టం జరగలేదని అధికారులు వెల్లడించారు.

అమెరికా హెచ్చరికలు – ట్రంప్‌ కఠిన వ్యాఖ్యలు

ఇరాక్‌లోని అమెరికా సైనిక స్థావరాలపై జరిగిన దాడులకు స్పందనగా అమెరికా మాజీ అధ్యక్షుడు డొనాల్డ్‌ ట్రంప్‌ తీవ్ర హెచ్చరికలు జారీ చేశారు. ఇరాన్‌ మరలా అలాంటి దాడులకు పాల్పడితే, టెహ్రాన్‌ నాశనం అవుతుందన్న హెచ్చరికను ఆయన వెలుబుచ్చారు. ఇరాన్‌ సుప్రీం లీడర్‌ ఖమేనీపై ఇజ్రాయెల్‌ ప్రణాళిక చేస్తే, దాన్ని తానే అడ్డుకున్నానని ట్రంప్‌ వ్యాఖ్యానించడంతో, ఈ వ్యాఖ్యలు మరింత దుమారం రేపుతున్నాయి.

శాంతి చర్చలపై ఆశలు నశించాయి

ఇజ్రాయెల్‌ దాడుల నేపథ్యంలో, ఆదివారం జరగాల్సిన అమెరికా-ఇరాన్‌ అణు చర్చలు రద్దయ్యాయి. ఇరాన్‌ విదేశాంగ శాఖ ఈ పరిణామాలపై తీవ్ర అసంతృప్తిని వ్యక్తం చేస్తూ.. ఇలాంటి పరిస్థితుల్లో చర్చలకు ప్రాధాన్యత లేదని స్పష్టం చేసింది.

ఇరాన్‌ శాంతికి సిద్ధం, కానీ షరతుతో

ఇరాన్‌ విదేశాంగ శాఖ అధికారి అబ్బాస్‌ అరాగ్చి ప్రకటన ప్రకారం – “ఇజ్రాయెల్‌ దాడులను ఆపితే, మేము కూడా ఆపుతాం” అని తెలిపారు. అయినప్పటికీ, ఇజ్రాయెల్‌ నుంచి స్పందన లేకపోవడంతో ఆదివారం రాత్రి ‘ఆపరేషన్‌ సాధిక్‌ ప్రామిస్‌-3’ పేరిట మరో దాడిని ప్రారంభించినట్టు ప్రకటించారు. ఇకపై అంతర్జాతీయ అణుశక్తి సంస్థ (IAEA)తో ఎలాంటి సమాచారం పంచుకోమని కూడా వెల్లడించారు.

ఇరాన్-ఇజ్రాయెల్‌ ఘర్షణ యుద్ధ స్థాయికి చేరుకుంటోంది. ఈ సంఘటనలు ప్రపంచానికి ఆందోళన కలిగిస్తున్నాయి. గల్ఫ్‌ దేశాలతో పాటు, అమెరికా, బ్రిటన్ వంటి దేశాల ప్రమేయంతో పరిస్థితి మరింత సంక్లిష్టంగా మారే అవకాశముంది. శాంతి చర్చలే దీన్ని అరికట్టగలవన్న అంచనాలు ఉన్నప్పటికీ, ప్రస్తుతం కనీసంగా రెండు దేశాలూ వెనక్కి తగ్గేలా కనిపించడం లేదు.