దేశవ్యాప్తంగా సోమవారం నుంచి జీఎస్‌టీ 2.0 అమల్లోకి రానుంది. దీని ప్రభావంతో వంటగది సరుకులు, ఎలక్ట్రానిక్స్, మందులు, వైద్య పరికరాలు, వాహనాలు, బీమా ప్రీమియం వరకు మొత్తం 375 రకాల ఉత్పత్తుల ధరలు తగ్గనున్నాయి. ఇప్పటికే ఎఫ్‌ఎంసీజీ, వాహన, ఎలక్ట్రానిక్స్, డెయిరీ కంపెనీలు తమ ఉత్పత్తుల ధరలను తగ్గిస్తున్నట్లు ప్రకటించాయి. కొత్త ధరలు ప్యాక్‌లపై ముద్రించకపోయినా, విక్రయాల్లో మాత్రం తక్కువ ధరలు అమలు చేయాలని ప్రభుత్వం స్పష్టంచేసింది.

వ్యక్తిగత సంరక్షణ ఉత్పత్తులైన ఫేస్‌పౌడర్, షేవింగ్ క్రీమ్, సబ్బులపై పన్ను రేటు 18% నుంచి 5%కి తగ్గించగా, హానికరమైన ఉత్పత్తులపై జీఎస్‌టీని 28% నుంచి 40%కి పెంచారు. ఈ మార్పుల వల్ల వ్యవస్థలోకి సుమారు 2 లక్షల కోట్ల రూపాయలు ప్రవేశిస్తాయని ఆర్థిక మంత్రి ఇటీవల వెల్లడించారు.

ఔషధాలు:
జీఎస్‌టీ కొత్త రేట్లతో మందుల ధరలు గణనీయంగా తగ్గనున్నాయి. సాధారణంగా 12% పన్ను ఉన్న వాటిని ఇప్పుడు 5%కి తగ్గించారు. క్యాన్సర్‌తో పాటు సంక్లిష్ట వ్యాధుల చికిత్సకు ఉపయోగించే 36 కీలక ఔషధాలపై పూర్తిగా పన్ను రద్దు చేశారు.

వాహనాలు:
రెండు చక్రాల వాహనాల ధరలు సుమారు ₹18,800 వరకు తగ్గనున్నాయి. కార్ల ధరలు గరిష్టంగా ₹4.48 లక్షల వరకు తగ్గుతాయి. లగ్జరీ కార్లు అయితే దాదాపు ₹30.4 లక్షల వరకు చవకవుతాయి.

టెలివిజన్లు:
32 అంగుళాల కంటే ఎక్కువ స్క్రీన్‌ ఉన్న టీవీలపై జీఎస్‌టీని 28% నుంచి 18%కి తగ్గించారు. దీని ఫలితంగా టీవీల ధరలు ₹2,500 నుంచి ₹85,000 వరకు తగ్గనున్నాయి.

• సోనీ ఇండియా తన బ్రావియా మోడళ్ల ధరలను ₹5,000 – ₹71,000 వరకు తగ్గించింది.

• ఎల్‌జీ కంపెనీ 43 అంగుళాల టీవీ ధరను ₹30,990 నుంచి ₹28,490కి, పెద్ద మోడళ్లపై కూడా సడలింపులు ప్రకటించింది.

• పానసోనిక్ 43 అంగుళాల టీవీల ధరలను ₹3,000 వరకు తగ్గించగా, 55 అంగుళాల టీవీలపై గరిష్టంగా ₹7,000 తగ్గించింది.

దసరా సీజన్‌లో ఈ తగ్గింపులు అమ్మకాలను మరింతగా పెంచే అవకాశం ఉందని కంపెనీలు అంచనా వేస్తున్నాయి.

హోటల్ గదులు:
₹7,500 వరకు అద్దె ఉన్న హోటల్ గదులపై జీఎస్‌టీని 12% నుంచి 5%కి తగ్గించారు. దీని వల్ల ఒక్క గదిపైనా కస్టమర్‌కు గరిష్టంగా ₹525 వరకు ఆదా అవుతుంది. ఈ నిర్ణయం హోటల్ రంగానికి పెట్టుబడులు, ఆకర్షణ, మంచి సేవల కోసం దోహదం చేస్తుందని అంచనా.

పతంజలి ఉత్పత్తులు:
న్యూట్రెలా సోయా చంక్స్, బిస్కెట్లు, నూడుల్స్, టూత్‌పేస్ట్, హెయిర్ ఆయిల్, ఆమ్లా జ్యూస్, చవన్‌ప్రాష్, ఆవు నెయ్యి వంటి అనేక ఉత్పత్తుల ధరలను పతంజలి తగ్గించింది. ఉదాహరణకు, న్యూట్రెలా సోయా చంక్స్ కిలో ప్యాక్ ధర ₹210 నుంచి ₹190కి తగ్గగా, 200 గ్రాముల ప్యాక్‌పై ₹3 తగ్గింపు వచ్చింది. దంత్ కాంతి టూత్‌పేస్ట్ (200 గ్రా.) ధర ₹120 నుంచి ₹106కి, ఆమ్లా హెయిర్ ఆయిల్ ధర ₹48 నుంచి ₹42కి తగ్గింది.

 మొత్తంగా, జీఎస్‌టీ కొత్త రేట్లతో వినియోగదారులకు ఉపశమనం లభించనుండగా, పండుగ సీజన్‌లో కొనుగోళ్లకు మరింత ఊపు దక్కనుంది.