రాబోయే స్థానిక సంస్థల ఎన్నికల్లో జడ్పీటీసీ స్థానాలకు అభ్యర్థుల ఎంపికపై కాంగ్రెస్ పార్టీ దృష్టి సారించింది. అక్టోబర్ 5వ తేదీ లోపు ప్రతి జిల్లాలో నుండి అభ్యర్థుల జాబితాలు పీసీసీకి చేరాలని సీఎం రేవంత్ రెడ్డి మంత్రులు, జిల్లా కాంగ్రెస్ కమిటీ అధ్యక్షులకు స్పష్టమైన ఆదేశాలు జారీ చేశారు.

సోమవారం సాయంత్రం జరిగిన జూమ్ సమావేశంలో ఆయన మాట్లాడుతూ, ప్రతి జడ్పీటీసీ స్థానానికి కనీసం ముగ్గురు బలమైన, అర్హులైన అభ్యర్థులను గుర్తించాలి అని సూచించారు. ఎంపీలు, ఎమ్మెల్యేలు, ఎమ్మెల్సీలు, స్థానికంగా ప్రభావం కలిగిన నేతలతో సంప్రదించి అభ్యర్థుల ఎంపిక చేయాలని ఆదేశించారు. ఈ సమావేశంలో పీసీసీ అధ్యక్షుడు మహేశ్‌కుమార్ గౌడ్, ఏఐసీసీ ఇన్‌ఛార్జ్ మీనాక్షి నటరాజన్, డిప్యూటీ సీఎం భట్టి విక్రమార్క తదితరులు పాల్గొన్నారు.

గెలుపే లక్ష్యం – సీఎం రేవంత్

రేవంత్ మాట్లాడుతూ, చిన్న తప్పిదం కూడా ఎన్నికల ఫలితాలను ప్రభావితం చేయవచ్చని, అందుకే అత్యంత జాగ్రత్తగా గెలుపు అవకాశాలున్న అభ్యర్థులను ఎంపిక చేయాలి అని చెప్పారు. అభ్యర్థుల తుది ఎంపికను పీసీసీ అక్టోబర్ 6, 7 తేదీల్లో పూర్తి చేస్తుందని ఆయన తెలిపారు. అదేవిధంగా ఇప్పటి నుంచే ప్రచారంపై దృష్టి పెట్టాలని, ముఖ్యంగా ప్రభుత్వం అమలు చేస్తున్న సంక్షేమ పథకాలు, అభివృద్ధి కార్యక్రమాలను ప్రజలకు విస్తృతంగా తెలియజేయాలని సూచించారు.

ఏకాభిప్రాయంతో ఎంపిక – పీసీసీ అధ్యక్షుడు

పీసీసీ అధ్యక్షుడు మహేశ్‌కుమార్ గౌడ్ మాట్లాడుతూ, అభ్యర్థుల ఎంపిక ప్రక్రియలో ఏకాభిప్రాయం ఉండాలని చెప్పారు. ఎక్కడైనా భిన్నాభిప్రాయాలు తలెత్తితే పీసీసీ తుది నిర్ణయం తీసుకుంటుందని స్పష్టం చేశారు. అలాగే బీసీ రిజర్వేషన్ల అమలు, జీఓల ద్వారా వెనుకబడిన వర్గాలకు కలిగే ప్రయోజనాలను ప్రజల్లో విస్తృతంగా చర్చించాలని సూచించారు.

ఎంపీటీసీ స్థానాలకు అయితే జిల్లా నేతలకే అభ్యర్థుల ఎంపిక అధికారం ఇవ్వాలని, ఎక్కడైనా పోటీ ఎక్కువగా ఉంటే పీసీసీ జోక్యం చేసుకుంటుందని కూడా నిర్ణయించారు.

సమష్టి కృషి అవసరం

కాంగ్రెస్ వర్గాల సమాచారం ప్రకారం, అభ్యర్థుల ఎంపిక నుంచి ప్రచారం, గెలుపు వరకు అందరూ కలిసికట్టుగా పనిచేయాలి అని నిర్ణయించారు. నామినేషన్ల స్వీకరణ మొదలయ్యేలోపు అన్ని స్థానాల అభ్యర్థుల ఎంపికను పూర్తిచేయాలని పార్టీ యోచిస్తోంది.

 మొత్తానికి, ఈసారి జడ్పీటీసీ ఎన్నికల్లో కాంగ్రెస్ పార్టీ ఎటువంటి పొరపాటు లేకుండా గెలుపే లక్ష్యంగా పనిచేయాలని సీఎం రేవంత్, పీసీసీ అధ్యక్షుడు స్పష్టమైన మార్గదర్శకాలు ఇచ్చినట్లు తెలుస్తోంది.