అమెరికా ప్రభుత్వం మరోసారి హెచ్-1బీ వీసా నియమాలను కఠినతరం చేసే దిశగా అడుగులు వేస్తోంది. ఇటీవలే వీసా ఫీజులను లక్ష డాలర్ల మేర పెంచిన విషయం ఇంకా చర్చలో ఉండగానే, ఇప్పుడు వీసా జారీ విధానంలో మార్పులకు సంబంధించిన కొత్త ప్రతిపాదనలు వచ్చాయి. అమెరికా హోంల్యాండ్ సెక్యూరిటీ శాఖ (DHS) తాజాగా ప్రకటించిన ఈ మార్పులు, ముఖ్యంగా వీసా దరఖాస్తుదారులు మరియు వారికి స్పాన్సర్ చేసే కంపెనీలపై అదనపు బాధ్యతలు మోపేలా ఉన్నాయి.

ట్రంప్‌ పాలనలోనే రూపొందిన “రిఫార్మింగ్ ది హెచ్-1బీ నాన్-ఇమిగ్రెంట్ వీసా క్లాసిఫికేషన్ ప్రోగ్రామ్” కింద కొత్త నిబంధనలు ఫెడరల్ రిజిస్టర్‌లో నమోదు అయ్యాయి. వీటిలో యజమానులు (Employers) వీసా పర్మిట్‌ను ఎలా ఉపయోగించాలి, ఎవరు దానికి అర్హులు అనే అంశాలను మరింత కఠినతరం చేయాలని ప్రతిపాదించారు. వీసా నిబంధనలను ఉల్లంఘించే కంపెనీలు, థర్డ్ పార్టీ కాంట్రాక్ట్ ఆధారంగా ఉద్యోగులను నియమించే సంస్థలపై ప్రత్యేకంగా దృష్టి పెట్టనున్నారు.

డీహెచ్‌ఎస్ ప్రకారం, ఈ మార్పుల ఉద్దేశ్యం అమెరికాలో పని చేసే స్థానిక కార్మికుల వేతనాలు, ఉద్యోగ పరిస్థితులు రక్షించడమే అని పేర్కొంది. అలాగే వీసా ప్రోగ్రామ్‌లో పారదర్శకత, సమగ్రతను పెంచడమే ఈ రిఫార్మ్‌ల లక్ష్యం అని వెల్లడించింది. కానీ, ఈ కొత్త ప్రతిపాదనలు ఎప్పుడు అమల్లోకి వస్తాయనే విషయంపై మాత్రం ఎటువంటి స్పష్టత ఇవ్వలేదు. అంతేకాదు, ఏ కంపెనీలు లేదా ఏ రకాల ఉద్యోగాలకే ఈ మినహాయింపులు వర్తిస్తాయో కూడా అధికారిక వివరాలు వెల్లడించలేదు.

ఇంతవరకు లాభాపేక్ష లేకుండా సేవలందించే సంస్థలు — ముఖ్యంగా రీసెర్చ్ ఇనిస్టిట్యూషన్లు, యూనివర్సిటీలు, హెల్త్‌కేర్ సంస్థలు — హెచ్-1బీ వీసా పరిమితి నుంచి మినహాయింపును పొందుతున్నాయి. కానీ ఈ కొత్త మార్పులు ఆ మినహాయింపులను కూడా ప్రభావితం చేసే అవకాశం ఉందని అంతర్జాతీయ మీడియా చెబుతోంది. దీంతో, ఇలాంటి సంస్థల్లో పనిచేస్తున్న అనేక మంది విదేశీ ఉద్యోగులు భవిష్యత్తులో ఆ అవకాశాలను కోల్పోయే ప్రమాదం ఉందని నిపుణులు హెచ్చరిస్తున్నారు.

భారతీయ విద్యార్థులు మరియు ఐటీ రంగ నిపుణులపై ఈ మార్పులు నేరుగా ప్రభావం చూపే అవకాశం ఉంది. ప్రస్తుతం అమెరికాలో పనిచేస్తున్న లేదా పనిచేయాలని ఉత్సాహంగా ఎదురుచూస్తున్న వేలాది మంది భారతీయులు హెచ్-1బీ వీసాపై ఆధారపడి ఉన్నారు. కొత్త నియమాలు అమల్లోకి వస్తే, వీసా ప్రక్రియ మరింత క్లిష్టతరం కావడంతో పాటు పోటీ కూడా పెరగవచ్చని అంచనా.

ప్రభుత్వ అధికారిక రికార్డుల ప్రకారం, ఈ కొత్త నిబంధనలు 2025 డిసెంబర్ నాటికి తుది రూపం దాల్చే అవకాశం ఉంది. అంటే, వీసా వ్యవస్థలో మార్పులు వచ్చే సంవత్సరం చివరికి అమల్లోకి రావచ్చన్నమాట. అమెరికా ఉద్యోగ అవకాశాల కోసం ఎదురు చూస్తున్న భారతీయులకిది మరో ఆందోళన కలిగించే పరిణామంగా మారింది.