రాష్ట్ర ప్రభుత్వం ఎంతో ప్రతిష్ఠాత్మకంగా ప్రకటించిన “ఇందిరమ్మ ఇండ్లు” పథకం అమలులో తీవ్ర ఆటంకాలు ఎదురవుతున్నాయి. పేదలకు ఇళ్లు కట్టిస్తామని ఇచ్చిన హామీ నెరవేరకపోవడంతో వేలాది కుటుంబాలు నిరాశలో మునిగిపోయాయి. నిర్మాణం మొదలైన ఇళ్లలో చాలా భాగం పునాదుల దశలోనే ఆగిపోవడం ఆ పరిస్థితికి నిదర్శనం.

ప్రభుత్వం అందిస్తున్న ఆర్థిక సాయం తగినంతగా లేకపోవడం, బిల్లులు సకాలంలో రాకపోవడం, కొందరు అధికారులు లంచాలు కోరుతున్నారన్న ఆరోపణలతో లబ్ధిదారులు ఇళ్ల నిర్మాణాన్ని కొనసాగించలేకపోతున్నారు. కొంతమంది తమవంతుగా గోడల దాకా కట్టించుకున్నా, బిల్లులు జమ కానందున ఆ పనులను మధ్యలోనే ఆపేశారు.

ఎన్నికల సమయంలో కాంగ్రెస్‌ ప్రభుత్వం రాష్ట్రవ్యాప్తంగా 20 లక్షల ఇళ్లు నిర్మిస్తామని హామీ ఇచ్చినా, అధికారంలోకి వచ్చిన తర్వాత కేవలం 4.5 లక్షల ఇళ్లకే అనుమతి ఇచ్చింది. అందులో 3.05 లక్షల ఇళ్లు లబ్ధిదారులకు కేటాయించబడ్డాయి. వీటిలో 2.25 లక్షల ఇళ్లు మాత్రమే నిర్మాణ దశలోకి వెళ్లగా, దాదాపు ఒక లక్ష ఇళ్లు పునాదుల దశలోనే నిలిచిపోయాయి.

లబ్ధిదారులలో ఆందోళన పెరుగుతోంది

పునాది పనులు పూర్తి అయిన తర్వాత రావాల్సిన మొదటి బిల్లు కూడా రాకపోవడంతో లబ్ధిదారులు ఆందోళన చెందుతున్నారు. “ఇంకా రెండు బిల్లులు వస్తాయని” నమ్మి కొందరు గోడలు వేసినా, నెలల తరబడి చెల్లింపులు జరగకపోవడంతో వారు కూడా ఆగిపోయారు. ఈ పరిస్థితిని సరిదిద్దడానికి బదులు అధికారులు ఇళ్లను రద్దు చేయడానికి సిద్ధమవుతున్నారు.

లబ్ధిదారులకు నోటీసులు జారీ చేస్తూ, “15 రోజుల్లో పనులు మొదలుపెట్టకపోతే ఇల్లు రద్దు అవుతుంది” అని హెచ్చరిస్తున్నారు.

సమస్యలకు పరిష్కారం దొరకడంలేదు

ఇల్లు మంజూరైన 45 రోజుల్లో నిర్మాణం ప్రారంభించాల్సి ఉన్నా, ప్రభుత్వ ప్రక్రియల్లో ఆలస్యం కారణంగా ఆ గడువు దాటిపోతోంది. ఫోటోలు ఆన్‌లైన్‌లో అప్‌లోడ్‌ చేసినా, బిల్లులు వారం రోజులలో జమ కావాల్సిన చోట నెలల తరబడి నిలిచిపోతున్నాయి. దీంతో చాలామంది “ప్రభుత్వం ఇచ్చే డబ్బుతో ఇల్లు కట్టడం సాధ్యమేనా?” అన్న సందేహంలో ఉన్నారు.

కాల్‌సెంటర్‌లు పనిచేయకపోవడం, అధికారుల లంచాలు

పథకానికి సంబంధించిన ఫిర్యాదులు చెబుదామని ప్రయత్నించినా కాల్‌సెంటర్‌లు స్పందించకపోవడం మరో సమస్య. బిల్లులు విడుదల చేయించేందుకు కొందరు అధికారులు లంచాలు కోరుతున్నారని లబ్ధిదారులు ఆరోపిస్తున్నారు. లంచం ఇవ్వని వారి ఫోటోలు ఆన్‌లైన్‌లో అప్‌లోడ్ చేయకుండా ఉంచి వేధిస్తున్నారని కూడా వారు చెబుతున్నారు.

అధికారుల వివరణ

ఈ పరిస్థితిపై హౌసింగ్‌ కార్పొరేషన్‌ ఎండీ గౌతమ్‌ స్పందించారు. కొంతమంది లబ్ధిదారులు ఆర్థిక ఇబ్బందుల కారణంగా స్వయంగా “ఇల్లు వద్దు” అని చెబుతున్నారని, కానీ ప్రభుత్వం వారికి సహాయం అందించడానికి ప్రయత్నిస్తోందని తెలిపారు. స్వయం సహాయక సంఘాల ద్వారా రుణ సహాయం అందించడానికి చర్యలు తీసుకుంటున్నామని చెప్పారు.

బ్యాంకు ఖాతాలు ఆధార్‌తో లింక్‌ కాకపోవడం వల్ల కొందరికి చెల్లింపులు ఆలస్యమవుతున్నాయని, అందుకోసం సాఫ్ట్‌వేర్‌లో మార్పులు చేస్తున్నామని గౌతమ్‌ తెలిపారు.