హాంకాంగ్‌లో చోటుచేసుకున్న భారీ అగ్నిప్రమాదం యావత్ ప్రపంచాన్ని దిగ్భ్రాంతికి గురిచేసింది. ఒక పెద్ద హౌసింగ్ ఎస్టేట్‌లో చెలరేగిన అగ్నికీలలు క్షణాల్లోనే ప్రళయంగా మారాయి. ఈ విషాద ఘటనలో ఇప్పటివరకు 44 మంది ప్రాణాలు కోల్పోగా, మరో 279 మందికి ఆచూకీ తెలియకపోవడం తీవ్ర ఆందోళనకు కారణమవుతోంది. ఒక్కసారిగా వేలాది మందిని భయాందోళనకు గురిచేసిన ఈ ప్రమాదం తీవ్రత ఎంత మేరకు ఉందో ఇదే స్పష్టం చేస్తోంది.

ఈ ఘోర అగ్నిప్రమాదం హాంకాంగ్ తైపో జిల్లాలోని వాంగ్ ఫు కోర్ట్ అనే అపార్ట్‌మెంట్ సముదాయంలో జరిగింది. మొత్తం 8 భవనాలతో కూడిన ఈ కాంప్లెక్స్‌లో దాదాపు 4,600 మందికి పైగా నివాసం ఉంటుందని అధికారులు అంచనా వేస్తున్నారు. మంటలు మొదలై 13 గంటలు దాటినా ఇంకా పూర్తిగా అదుపులోకి రాకపోవడం పరిస్థితి ఎంత ప్రమాదకరంగా ఉందో తెలిపుతోంది.

అగ్నిమాపక సిబ్బంది కూడా బలితీసుకున్న ప్రమాదం

మంటలను ఆర్పేందుకు రంగంలోకి దిగిన అగ్నిమాపక సిబ్బంది తీవ్ర ప్రమాదాన్ని ఎదుర్కొన్నారు. మంటలను అదుపులోకి తీసుకొచ్చే ప్రయత్నంలో ఒక అగ్నిమాపక సిబ్బంది ప్రాణాలు కోల్పోయారు. మరో సిబ్బంది తీవ్ర గాయాలతో ఆస్పత్రిలో చికిత్స పొందుతున్నారు. మొత్తం 700 మందికి పైగా అగ్నిమాపక సిబ్బంది నిరంతరం శ్రమిస్తున్నప్పటికీ, భవనాల్లో ఇంకా పలువురు చిక్కుకుని ఉండవచ్చని భావిస్తున్నారు. అయితే లోపల ఎంతమంది ఉన్నారు అనే విషయంపై ఇంకా అధికారిక స్పష్టత రాలేదు.

ఈ ప్రమాదాన్ని హాంకాంగ్‌లో అత్యంత ప్రమాదకర స్థాయిగా పరిగణించే ‘లెవల్ ఫైవ్’ అగ్నిప్రమాదంగా అధికారులు గుర్తించారు. ఇలాంటి స్థాయి ప్రమాదాలు చాలా అరుదుగా జరుగుతాయని చెబుతున్నారు.

పరిసర ప్రాంతాల్లో ఉద్రిక్త పరిస్థితి

మంటలు సమీప భవనాలకు వ్యాపించే ప్రమాదం ఉండటంతో పోలీసులు వేగంగా స్పందించారు. ప్రమాద ప్రాంతం చుట్టుపక్కల ఉన్న వెయ్యి మందికి పైగా ప్రజలను తక్షణమే ఖాళీ చేయించి, సురక్షిత షెల్టర్లకు తరలించారు. భద్రతా చర్యలలో భాగంగా చుట్టూ ఉన్న అనేక రహదారులను మూసివేశారు. నగర రవాణాపై ప్రభావం పడకుండా ఉండేందుకు 30కు పైగా బస్సు మార్గాలను మళ్లించారు.

ఈ అపార్ట్‌మెంట్ సముదాయం సముద్రతీరం, ప్రధాన రహదారులకు సమీపంలో ఉండటంతో అగ్నికీలలు వేగంగా వ్యాపించాయని అధికారులు భావిస్తున్నారు. ప్రమాద స్థలం నుంచి కేవలం 500 మీటర్ల దూరంలోనే తాయ్ పో రైల్వే స్టేషన్ ఉండటంతో రైలు సేవలపైనా ప్రభావం పడింది.

మంటలు వేగంగా వ్యాపించడానికి కారణాలపై అనుమానాలు

ఈ ఫ్లాట్లు సాధారణంగా 400 నుంచి 500 చదరపు అడుగుల పరిమాణంలో ఉండగా, భవనాల మధ్య దూరం తక్కువగా ఉంటుంది. అధిక జనసాంద్రతతో పాటు, భవనాల బయట మరమ్మతుల కోసం ఏర్పాటు చేసిన వెదురు బొంగుల (స్కాఫోల్డింగ్) కారణంగా మంటలు వేగంగా వ్యాప్తి చెందినట్లు ప్రాథమిక అంచనా. ఇవే అగ్నికీలలకు ఆహుతివ్వడంతో, అగ్ని నియంత్రణ మరింత క్లిష్టంగా మారినట్లు భావిస్తున్నారు.

ప్రపంచాన్ని కలవరపెడుతున్న విషాదం

ఈ ప్రమాదంతో వేలాది కుటుంబాల జీవితం అనిశ్చితిలో పడిపోయింది. ప్రాణాలు కోల్పోయిన వారి సంఖ్య పెరిగే అవకాశముందన్న ఆందోళన కొనసాగుతోంది. సహాయక బృందాలు ఇంకా శిథిలాలను పరిశీలిస్తూ, చిక్కుకున్న వారిని బయటకు తీసేందుకు తీవ్ర ప్రయత్నాలు చేస్తున్నాయి. హాంకాంగ్ చరిత్రలోనే అత్యంత భయంకరమైన అగ్నిప్రమాదాలలో ఒకటిగా ఇది మిగిలిపోనుందన్న అభిప్రాయం వ్యక్తమవుతోంది.