దేశంలోనే తొలిసారిగా ఆధ్యాత్మిక సంప్రదాయాలు, పర్యావరణ పరిరక్షణ రెండింటినీ ఒకే దారిలో నడిపించే ‘దివ్య వృక్షాల ప్రాజెక్టు’ను తిరుమల తిరుపతి దేవస్థానాలు (టీటీడీ) ప్రారంభించడానికి సిద్ధమయ్యాయి. ఈ ప్రతిష్ఠాత్మక ప్రాజెక్టును సుమారు 100 ఎకరాల విస్తీర్ణంలో అమలు చేయనున్నట్లు టీటీడీ చైర్మన్ బీ.ఆర్. నాయుడు వెల్లడించారు.

ఈ ప్రాజెక్టు ప్రధాన లక్ష్యం… హిందూ ఆలయాల్లో అత్యంత ప్రాముఖ్యం కలిగిన ధ్వజస్తంభాల నిర్మాణానికి అవసరమైన పవిత్ర వృక్షాలను టీటీడీ స్వయంగా పెంచి, సంరక్షించి వినియోగించడమే. ప్రాచీన ఆగమ శాస్త్రాల ప్రకారం తయారయ్యే ధ్వజస్తంభాలకు తగిన వృక్షాలు లభ్యతలో ఉండేలా దీర్ఘకాలిక ప్రణాళికతో ఈ కార్యక్రమాన్ని ప్రారంభిస్తున్నారు. సీఎం చంద్రబాబు నాయుడు దూరదృష్టితో రూపొందించిన తిరుమల అభివృద్ధి లక్ష్యాలకు ఇది అనుగుణంగా ఉంటుందని బీ.ఆర్. నాయుడు తెలిపారు.

సంప్రదాయాల పరిరక్షణతో పాటు భవిష్యత్ తరాలకు ఉపయోగపడే బాధ్యతాయుత పాలనకు ఈ ప్రాజెక్టు ఉదాహరణగా నిలుస్తుందని ఆయన పేర్కొన్నారు.

ధ్వజస్తంభానికి ఉన్న ఆధ్యాత్మిక ప్రాముఖ్యత

ధ్వజస్తంభం ఒక నిర్మాణ భాగం మాత్రమే కాదు. అది దైవ లోకానికి, భౌతిక లోకానికి మధ్య ఉన్న పవిత్ర బంధానికి ప్రతీకగా భావిస్తారు. ఆలయ ప్రాంగణంలో నిటారుగా నిలిచే ధ్వజస్తంభం భక్తి, శుద్ధి, దైవ సన్నిధిని ప్రతిబింబిస్తుంది.

ఆగమ శాస్త్రాల ప్రకారం ధ్వజస్తంభం నిటారుగా పెరిగిన ఒకే పవిత్ర వృక్షం కాండంతోనే తయారు చేయాలి. ఆ వృక్షాన్ని ఆధ్యాత్మిక, జ్యోతిష్య నియమాల ప్రకారం ఎంపిక చేసి, ఎన్నో సంవత్సరాలు సంరక్షిస్తారు. అనంతరం శాస్త్రోక్త పూజలు, కైంకర్యాలు నిర్వహించిన తర్వాత మాత్రమే ధ్వజస్తంభంగా వినియోగిస్తారు.

ధ్వజస్తంభాల తయారీలో ఉపయోగించే పవిత్ర వృక్షాలు

ఆగమ సంప్రదాయాల ప్రకారం ధ్వజస్తంభాల తయారీలో ప్రధానంగా టేకు, ఏగిశా (ఇండియన్ కినో), టెర్మినేలియా, షోరియా జాతి వృక్షాలు ఉపయోగిస్తారు. ఇవి బలంగా ఉండటం, దీర్ఘకాలం నిటారుగా నిలిచే గుణం కలిగి ఉండటం వల్ల ధ్వజస్తంభాలకు అనుకూలంగా ఉంటాయి.

పూర్తి పరిపక్వత సాధించిన తర్వాత ఆ వృక్షాన్ని శాస్త్రోక్తంగా పూజించి ధ్వజస్తంభంగా రూపుదిద్దుతారు. తరువాత కవచంతో కప్పి, తిరుమల శ్రీ వేంకటేశ్వర స్వామి ఆలయం వంటి పవిత్ర క్షేత్రాల్లో స్వర్ణ కవచంతో అలంకరిస్తారు. రాజగోపురం, గర్భగుడి విమానం మధ్య పవిత్ర స్థలంలో ప్రతిష్ఠించే ఈ ధ్వజస్తంభంపై గరుడ ధ్వజాన్ని ఆవిష్కరిస్తారు.

ప్రతి ఏడాది బ్రహ్మోత్సవాల ప్రారంభంలో జరిగే ధ్వజారోహణం సమస్త లోకాల్లోని దేవతలను ఆహ్వానించే శుభ సూచకంగా భావిస్తారు.

భవిష్యత్ అవసరాలపై టీటీడీ దూరదృష్టి

ప్రస్తుతం దేశవ్యాప్తంగా 60కు పైగా ఆలయాలను టీటీడీ నిర్వహిస్తోంది. రాబోయే రోజుల్లో వివిధ రాష్ట్రాలు, కేంద్ర పాలిత ప్రాంతాల్లో శ్రీ వేంకటేశ్వర స్వామి ఆలయాలను ఆగమ నియమాలకు అనుగుణంగా నిర్మించే ప్రణాళికలు ఉన్నాయి. ఈ నేపథ్యంలో భవిష్యత్తులో అవసరమయ్యే ధ్వజస్తంభాల కోసం పవిత్ర కలపను ముందుగానే సిద్ధం చేసుకోవడమే ఈ దివ్య వృక్షాల ప్రాజెక్టు ప్రధాన ఉద్దేశం.

కాలక్రమేణ మార్పు అవసరమైన ధ్వజస్తంభాల స్థానంలో శాస్త్రోక్తంగా కొత్త ధ్వజస్తంభాలను ఏర్పాటు చేయడానికీ ఈ ప్రాజెక్టు ఉపయోగపడనుంది.

100 ఎకరాల్లో దివ్య వృక్షాల ప్రాజెక్టు

ఈ ప్రతిష్ఠాత్మక కార్యక్రమం కోసం సుమారు 100 ఎకరాల భూమిని కేటాయించాలని టీటీడీ బోర్డు ప్రతిపాదించింది. ఈ ప్రాజెక్టు అమలుతో, ధ్వజస్తంభాల కోసం అవసరమైన పవిత్ర వృక్షాలను స్వయంగా పెంచే దేశంలో తొలి దేవాలయ సంస్థగా టీటీడీ చరిత్ర సృష్టించనుంది.

ఈ కార్యక్రమం ద్వారా

• ఆగమ శుద్ధి

• ఆధ్యాత్మిక పవిత్రత

• పర్యావరణ పరిరక్షణ

• సంస్థాగత స్వావలంబన

అన్నింటినీ సమన్వయంగా తరతరాలకు కొనసాగించవచ్చని టీటీడీ స్పష్టం చేసింది.