కడప జిల్లాలో చోటుచేసుకున్న అమానుష ఘటనపై ఆంధ్రప్రదేశ్ డిప్యూటీ సీఎం పవన్ కళ్యాణ్ తీవ్రంగా స్పందించారు. YSR జిల్లా మైలవరం మండలంలోని కంబాలదిన్నె గ్రామంలో ఒక మూడేళ్ల చిన్నారిపై జరిగిన లైంగిక దాడి, అనంతరం హత్య సంఘటన రాష్ట్రవ్యాప్తంగా తీవ్ర ఆవేదన కలిగించింది. ఈ దారుణానికి పాల్పడిన నిందితుడిని కఠినంగా శిక్షించే బాధ్యతను కూటమి ప్రభుత్వం తీసుకుంటుందని పవన్ హామీ ఇచ్చారు.

ఈ ఘటనపై ఎక్స్‌ (ట్విట్టర్‌) వేదికగా స్పందించిన పవన్ కళ్యాణ్ మాట్లాడుతూ –"అభంశుభం తెలియని చిన్నారిపై ఇలాంటి పాశవికం చేయడం చూస్తే మానవత్వం విలువలు ఏమైపోయాయో అనిపిస్తోంది. ఇది మానవ సమాజానికి తలదించుకునే స్థితి."పవన్ ఈ ఘటనను గుర్తుచేసుకుంటూ గతంలో కథువాలో ఆసిఫా అనే చిన్నారి విషయంలో దేశవ్యాప్తంగా వ్యక్తమైన ఆగ్రహాన్ని ఉదాహరించారు. "అప్పుడు నిందితులు కఠినంగా శిక్షించబడతారని ఆశించాం, కానీ ఇలాంటి ఘటనలు ఇంకా జరుగుతుండటం విచారకరం. నిందితుల్లో చట్టాన్ని లెక్కచేయకపోవడం, శిక్షల భయం లేకపోవడమే దీనికి కారణం కావొచ్చు," అని పవన్ అభిప్రాయపడ్డారు.

పవన్ కళ్యాణ్‌ తెలిపారు:"ఇప్పటికే పోలీసులు నిందితుడిని అరెస్టు చేశారు. పాక్సో చట్టం కింద కేసు నమోదు చేసి పూర్తిస్థాయిలో దర్యాప్తు చేస్తున్నారు."

ఈ కేసులో నిందితుడికి దోషిగా తేలిన తర్వాత కఠిన శిక్షపడేలా చర్యలు తీసుకోవాలని, తద్వారా భవిష్యత్తులో ఇలాంటి అమానుషానికి పాల్పడాలని భావించే వారు భయపడే పరిస్థితి రావాలని ఆయన కోరారు.

ఈ ఘటనపై తీవ్రంగా స్పందించిన పవన్ –"బాలిక కుటుంబానికి నా ప్రగాఢ సానుభూతి తెలియజేస్తున్నాను. ఇలాంటి ఘటనలపై కఠినంగా స్పందించాల్సిన అవసరం సమాజానికి ఉంది. న్యాయశాఖ, హోంశాఖ మంత్రి అనిత, డీజీపీతో చర్చించి ఈ కేసును త్వరితగతిన న్యాయస్థానంలో తీసుకెళ్లి, న్యాయం జరిగేలా చూస్తాం. కూటమి ప్రభుత్వం బాధ్యత వహిస్తుంది." అని స్పష్టం చేశారు.

చిన్నారులపై జరుగుతున్న అఘాయిత్యాలకు ముగింపు రావాలంటే, ప్రభుత్వ చర్యలతో పాటు, సమాజం మొత్తం మేల్కొనాల్సిన అవసరం ఉందని పవన్ సూచించారు."ఇలాంటి ఘటనలు పునరావృతం కాకుండా ఉండాలంటే, నిందితులకు కఠిన శిక్షలే సముచిత పరిష్కారం. ప్రజల్లో చట్టపట్ల నమ్మకం పెరగాలి. న్యాయ వ్యవస్థపై విశ్వాసం ఉండాలి."

ఈ ఘటన రాష్ట్రవ్యాప్తంగా తీవ్ర దిగ్భ్రాంతి కలిగించిన నేపథ్యంలో, పవన్ కళ్యాణ్ చేసిన హామీ, ప్రభుత్వ ధృఢ నిర్ణయం ప్రజలకు కొంత భరోసా కలిగించనున్నాయి. నిందితుడికి శిక్ష పడే వరకు రాష్ట్ర ప్రభుత్వం తరఫున న్యాయపరంగా ప్రతి చర్య తీసుకుంటామని పవన్ స్పష్టం చేశారు.