దేశంలో ఒకే రాష్ట్రానికి ఒకే ప్రాంతీయ గ్రామీణ బ్యాంక్ (RRB) విధానాన్ని ఈ సంవత్సరం మే 1 నుంచి అమల్లోకి తీసుకురానున్నట్లు కేంద్ర ఆర్థిక శాఖ స్పష్టం చేసింది. దీనికి సంబంధించి కేంద్ర ప్రభుత్వం అధికారిక నోటిఫికేషన్ విడుదల చేసింది.ఈ నిర్ణయంతో 11 రాష్ట్రాల్లో ఉన్న 15 RRBలను విలీనం చేయనున్నారు. వాటిలో ఆంధ్రప్రదేశ్, ఉత్తరప్రదేశ్, పశ్చిమ బెంగాల్ వంటి రాష్ట్రాలు ఉన్నాయి. విలీనం పూర్తయితే దేశంలో ఉన్న RRBల సంఖ్య 43 నుంచి 28కి తగ్గుతుంది.

2004-05 నుంచే కేంద్ర ప్రభుత్వం RRBలను విలీనం చేసే ప్రక్రియ ప్రారంభించింది. ఇప్పటివరకు మూడు దశల్లో 196 బ్యాంకులు 43కి తగ్గిపోయాయి. ఇప్పుడు మరో దశలో, మిగిలిన కొన్ని బ్యాంకులను కలిపే ప్రణాళిక అమలవుతోంది.

ఆంధ్రప్రదేశ్‌లో ఉన్న చైతన్య గోదావరి గ్రామీణ బ్యాంక్, ఆంధ్ర ప్రగతి గ్రామీణ బ్యాంక్ మరియు సప్తగిరి గ్రామీణ బ్యాంక్ ఈ మూడు బ్యాంకులు కలిసి ఒకే సంస్థగా మారనున్నాయి. ఈ కొత్త బ్యాంక్‌ను ఆంధ్రప్రదేశ్ గ్రామీణ బ్యాంక్గా పిలుస్తారు. ఇది అమరావతిలో ప్రధాన కార్యాలయంతో కొనసాగుతుంది. యూనియన్ బ్యాంక్ ఆఫ్ ఇండియా ఈ బ్యాంక్‌కు స్పాన్సర్‌గా వ్యవహరిస్తుంది.

ఇతర రాష్ట్రాల్లో పరిస్థితి:

• ఉత్తరప్రదేశ్‌లో బరోడా యూపీ బ్యాంక్‌, ఆర్యవర్ట్ బ్యాంక్‌, ప్రథమ యూపీ గ్రామీణ బ్యాంక్‌లు విలీనం అవుతాయి. ప్రధాన కార్యాలయం లక్నోలో ఉంటుంది.

• పశ్చిమ బెంగాల్‌లో, మూడు RRBలు కలిసిపోతాయి. ఇది పశ్చిమ బెంగాల్ గ్రామీణ బ్యాంక్‌గా మారుతుంది.

ఇలాగే ఇంకా ఎనిమిది రాష్ట్రాల్లో కూడా విలీనాలు జరుగుతాయి.
ప్ర‌స్తుతం ఆర్‌ఆర్‌బీ బ్యాంకుల్లో కేంద్ర ప్రభుత్వ వాటా 50%, స్పాన్సర్ బ్యాంకులది 35%, రాష్ట్రాలది 15%గా ఉంది. మారిన చట్టం ప్రకారం, కేంద్రం మరియు స్పాన్సర్ బ్యాంకుల వాటా కలిపి 51 శాతం కన్నా తక్కువగా ఉండకూడదు.

ప్రాంతీయ గ్రామీణ బ్యాంకులు ముఖ్యంగా చిన్న రైతులు, వ్యవసాయ కూలీలు, గ్రామీణ కళాకారులకు రుణాలు, ఇతర బ్యాంకింగ్ సేవలు అందించేందుకు ఏర్పాటు చేశారు.
ఈ మార్పులతో గ్రామీణ ప్రాంతాల్లో బ్యాంకింగ్ వ్యవస్థ మరింత బలోపేతం కానుందని నిపుణులు అభిప్రాయపడుతున్నారు.