Breaking News

ఉచిత విద్యుత్ పథకం కావాలా.. ఆధార్, రేషన్ కార్డులతో రెడీగా ఉండండి..!

విద్యుత్ వినియోగదారులకు ముఖ్య గమనిక. గృహ జ్యోతి పథకం కింద ఉచిత కరెంట్ కావాలనుకుంటున్నారా. అయితే.. రేషన్ కార్డు, ఆధార్ కార్డు రెడీగా పెట్టుకోండి. మీటర్ రీడింగ్ నమోదు చేసుకునే సిబ్బంది వచ్చినప్పుడు.. మీ రేషన్ కార్డు నెంబర్, ఆధార్ కార్డు నెంబర్‌తో పాటు మొబైల్ నెంబర్ కూడా ఇవ్వండి..


Published on: 06 Feb 2024 10:39  IST

తెలంగాణలోని విద్యుత్ వినియోగదారులకు విద్యుత్ శాఖ ముఖ్య గమనిక చేసింది. రేషన్ కార్డులు, ఆధార్ కార్డులు దగ్గర పెట్టుకోండి అని చెప్తూ.. ఓ ప్రకటన విడుదల చేసింది. మీ మైండ్‌లో రన్ అవుతుంది నిజమే. గృహ జ్యోతి పథకం కింద.. ప్రతి ఇంటికి 200 యూనిట్ల మేరకు ఉచిత కరెంట్ ఇచ్చేందుకు రేవంత్ సర్కార్ సిద్ధమైంది. ఈ క్రమంలోనే.. కేబినెట్ కూడా ఆమోదం తెలిపింది. ఇక.. 8న జరిగే అసెంబ్లీ బడ్జెట్ సమావేశాల్లో ఈ పథకాన్ని అధికారికంగా ప్రకటిస్తారు. బడ్జెట్‌లో ఈ పథకానికి నిధులు కూడా కేటాయించనున్నారు. కాగా.. ఇప్పటికే పథకం అమలు కోసం అధికారులు ప్రణాళికలు రచించగా.. విద్యుత్ శాఖ పేరుతో ఓ సర్క్యూలర్ ఇప్పుడు సోషల్ మీడియాలో వైరల్ అవుతోంది.

గృహ జ్యోతి పథకం ద్వారా నెలకు 200 యూనిట్లు ఉచితంగా పొందేందుకు గానూ విద్యుత్ వినియోగదారులు రేపటి నుంచి మీ ఇంటి వద్దకు వచ్చి మీటర్ రీడరు (బిల్లు కొట్టేవారికి) నమోదు చేసుకునేవారికి.. మీ రేషన్ కార్డు (బియ్యం కార్డు), ఆధార్ కార్డులను చూపించి మీ యొక్క సర్వీస్ నెంబరుకు అనుసంధానం చేయుటకు సహకరించి ప్రభుత్వ పథకం ద్వారా లబ్ధి పొందాలని విజ్ఞప్తి చేయడమైనది. అంటూ విద్యుత్ శాఖ పేరుతో ఓ ప్రకటన సోషల్ మీడియాలో వైరల్ అవుతోంది. దీనిపై విద్యుత్ శాఖ నుంచి మాత్రం ఇప్పటి వరకు ఎలాంటి అధికారిక ప్రకటన రాకపోవటం గమనార్హం.

మరోవైపు.. ముఖ్య గమనికతో పాటు ఓ సర్క్యూలర్ కూడా వైరల్ అవుతోంది. ఇందులో.. గృహలక్ష్మి పథకాన్ని ప్రజలకు వర్తింపజేసేందుకు ఏం చేయాలన్నది, విద్యుత్ సిబ్బందికి తెలియజేస్తూ కొన్ని నిబంధనలు ఉన్నాయి. అయితే.. ఇది విద్యుత్ శాఖ అధికారంగా విడుదల చేసిందో కాదో తెలియాల్సి ఉంది. అయితే.. ఇందులో లబ్ధిదారుల నుంచి రేషన్ కార్డు నెంబర్, ఆధార్ కార్డు నెంబర్‌తో పాటు ఫోన్ నెంబర్‌ను కూడా సేకరించాల్సి ఉంటుందని ఉంది. కాగా.. ఈ ప్రక్రియను ఫిబ్రవరి 15 వరకు పూర్తి చేయాల్సి ఉంటుందని పేర్కొన్నారు.

Follow us on , &

ఇవీ చదవండి