హైదరాబాద్ నగరంలో తాగునీటి వృథా పై నియంత్రణ పెట్టేందుకు జలమండలి కీలక చర్యలు తీసుకుంటోంది. ఇప్పుడు వినియోగదారులు శుద్ధి చేసిన నీటిని అనవసరంగా వాడితే, వారిపై కఠినంగా వ్యవహరించనున్నట్లు తెలిపింది. ఈ చర్యల అమలులో భాగంగా, జలమండలి ప్రత్యేకంగా ఒక మొబైల్ యాప్‌ను అభివృద్ధి చేస్తోంది. ఈ యాప్ ద్వారా నీటి వృథా చోటు చేసుకున్న ప్రాంతాలను గుర్తించి, ఫోటోలు, వినియోగదారుల వివరాలు, వాటర్ క్యాన్ నంబర్ వంటి సమాచారాన్ని నమోదు చేయగలుగుతారు. దీనివల్ల అదే యాప్‌లోనే తగిన జరిమానా నోటీసును జెనరేట్ చేయడం జరుగుతుంది. ఈ నోటీసులు సంబంధిత వినియోగదారుల ఫోన్ నంబర్ లేదా ఇమెయిల్‌కు పంపబడతాయి.

ప్రస్తుతం నగరంలో 13.5 లక్షల నీటి కనెక్షన్లు ఉన్నాయని, అందులో 8.5 లక్షల కనెక్షన్లకు ప్రభుత్వం ఉచితంగా నెలకు 20,000 లీటర్ల తాగునీటిని సరఫరా చేస్తోందని అధికారులు తెలిపారు. నీటి శుద్ధి, సరఫరాకు ప్రతి 1000 లీటర్లకు సగటున రూ.48 ఖర్చవుతోంది. ఈ నీటిని కొంతమంది తమ కార్లు కడగడానికి, ఇంటి పరిసరాలు శుభ్రం చేయడానికి, తోటలలో వృథాగా వాడుతున్నారు. ఇది చట్టానికి విరుద్ధమని, తాగునీటి వాడకంపై బాధ్యతతో వ్యవహరించాల్సిన అవసరం ఉందని పేర్కొన్నారు. వచ్చే రెండేళ్ల వరకు గోదావరి ప్రాజెక్టుల పనులు పూర్తయ్యే వరకు అదనపు నీటి వనరులు అందుబాటులోకి రాలేదని, అందువల్ల ప్రస్తుతం ఉన్న నీటినే సద్వినియోగం చేసుకోవాలని సూచించారు.

ఈ తరహా వృథాను అరికట్టేందుకు అవగాహన కార్యక్రమాలు చేపట్టాలని, ప్రజల్లో బాధ్యతాయుతమైన నీటి వినియోగంపై దృష్టి పెట్టేలా చేయాలని అధికారులు భావిస్తున్నారు.

ఇక జరిమానాల విషయానికి వస్తే, ప్రస్తుతం అమలులో ఉన్న చట్టం ప్రకారం విధించే జరిమానాలు చాలా పాతవని, అవి 35 ఏళ్ల క్రితం ఏర్పాటైనవని చెప్పారు. అందుకే వాటిని మరింత ప్రభావవంతంగా మార్చేందుకు ప్రతిపాదనలు ప్రభుత్వానికి పంపినట్లు జలమండలి అధికారులు తెలిపారు. ప్రస్తుతం మొదటిసారిగా నీటిని వృథా చేస్తే రూ.1000 జరిమానా విధిస్తున్నారు. ఇకపై ఈ మొత్తం రూ.5000కి పెంచే అవకాశం ఉందని వివరించారు. రిజర్వాయర్ల వద్ద ఫ్లో మీటర్లను ఏర్పాటు చేయడం ద్వారా నీటి వినియోగం స్పష్టంగా అంచనా వేసేలా చేయనున్నారు. ఇలా చేస్తే వృథాను అదుపులో పెట్టే అవకాశం ఎక్కువగా ఉంటుందని భావిస్తున్నారు.